طلبان کی پہلی پریس کانفرنس، تمام مخالفین کو معاف کرنے کا اعلان

طالبان ترجمان ذبیح اللہ مجاہد کا کہنا ہے کہ ہم نے عام معافی کا اعلان کرکے سب کو معاف کردیا ہے اسلامی امارت افغانستان آج سے کسی کے ساتھ دشمنی نہیں رکھے گا۔ 

کابل میں پہلی بار پریس کانفرنس کرتے ہوئے طالبان ترجمان ذبیح اللہ مجاہد کا کہنا ہے کہ افغانستان کو 20 سال بعد قابض قوتوں سے آزاد کردیا ہے۔

ترجمان کا کہنا تھا کہ ہماری فتح پوری افغان قوم کی فتح ہے افغانستان کو قبضے سے چڑانا ہمارے لئے قابل فخر بات ہے۔

انہوں نے کہا آزادی ہر قوم کا بنیادی حق ہے اور 20 سال بعد ہم نے افغانستان کو طویل جنگ کے بعد آزاد کردیا ہے۔

ذبیح اللہ مجاہد کا کہنا تھا کہ ہم تمام بین الاقوامی دینا کو یقین دلاتے ہیں افغانستان میں موجود ان کے شہری اور سفارتکاروں کی حفاظت ہماری ذمہ داری ہے۔

انہوں نے کہا کہ امریکا سمیت تمام دنیا بشمول خطے کے ممالک کے سب کو یقین دلاتے ہیں کہ افغان سرزمین کسی ملک کیخلاف استعمال نہیں ہوگی۔

ذبیح اللہ مجاہد کا کہنا تھا کہ افغانستان میں اسلامی نظام کے تشکیل کےلئے مشاورت جاری ہے۔

انہوں نے کہا کہ کسی سے ذاتی دشمنی نہیں پال رہے نہ کسی کو کوئی نقصان پہنچایا جائے گا، ہم چاہتے ہیں کہ افغانستان مزید کسی جنگ کا میدان نہ بنے۔ 

طالبان ترجمان کا کہنا تھا کہ دنیا کو تسلی دیتے ہے کہ افغانستان کسی کیخلاف استعمال نہیں ہوگا مگر ہم بھی دنیا سے توقع کرتے ہے کہ وہ ہم سے براہ راست بات کرے۔

انہوں نے کہا کہ دنیا کو چاہئے کہ دنیا کو ہم سے بین الاقوامی قوانین کے مطابق تعلق رکھنا چاہئے تاکہ ہمارے درمیان کوئی سیاسی مسئلہ پیدا نہ ہو۔