حکومت کے نشانے پر صرف پاکستان پیپلز پارٹی ہے:بلاول بھٹو

تفصیلات کے مطابق سکھر میں میڈیا سے گفتگو کرتے ہوئے بلاول بھٹو کا کہنا تھا کہ پی ڈی ایم کی سیاست سے حکومت کو فائدہ پہنچ رہا ہےاگر یہ ہمارے طریقہ کار پر چلتے تو زیادہ کامیاب ہوتے۔

ان کا کہنا تھا کہ پی ڈی ایم جلسے کو ناکام اور کامیاب نہیں کہہ سکتا، جلسے بارے میڈیا زیادہ بہتر بتا سکتا ہے، شاید جلسہ زیادہ کامیاب ہوتا اگر خواتین کو آنے کی اجازت دیتے۔

چیئرمین پیپلز پارٹی نے کہا کہ یوسف رضا گیلانی کو منتخب کرا کے ہم نے ایک طریقہ کار بتا دیا تھا، اگر باقی جماعتیں ہماری بات مان لیتیں تو پہلے پنجاب اور پھر وفاقی حکومت کو گھر بھیجتے, اپوزیشن غیر سنجیدہ ہے۔ آج بھی اپنے دوستوں کو کہتے ہیں کہ آپ کو حکومت کو ہٹانے کا راستہ دکھا دیا تھا۔

بلاول بھٹو نے کہا کہ اسلام نے خواتین کو حقوق دیئے ہیں۔ ایسی سوچ اسلام سے پہلے تھی جو خواتین کو معاشرے میں جگہ نہیں دینا چاہتے۔ کوئی بھی معاشرہ خواتین کے بغیر ترقی نہیں کرسکتا۔ شاید یہ وجہ ہوگی کہ ان کے جلسے کو کراچی والوں نے مسترد کیا۔

ان کا مزیدکہنا تھا کہ باجوڑ فائرنگ میں پاکستان کے فوجیوں کو شہید کیا گیا، اس کی ہم شدید مذمت کرتے ہیں ہم سے برداشت نہیں ہوگا کہ کوئی ہماری فوج پر حملہ کرے طالبان کو یقینی بنانا ہوگا کہ افغان سرزمین پاکستان کے خلاف استعمال نہ ہو۔