سپریم کورٹ آف پاکستان میں پریکٹس اینڈ پروسیجر ایکٹ کے خلاف درخواستوں پر سماعت کل ہوگی، چیف جسٹس کی سربراہی میں فل کورٹ کیس کی سماعت کرے گا۔عدالتی کارروائی براہ راست نشر کرنےکےلئے سرکاری ٹی وی کو ہدایات جاری کر دی گئیں۔

18 ستمبر کو چیف جسٹس قاضی فائز عیسیٰ کی سربراہی میں فل کورٹ نے سپریم کورٹ پریکٹس اینڈ پروسیجر ایکٹ کے خلاف آئینی درخواستوں پر سماعت 3 اکتوبر تک ملتوی کردی تھی۔ چیف جسٹس سپریم کورٹ جسٹس قاضی فائز عیسیٰ کی سربراہی میں فل کورٹ بینچ صبح ساڑھے 9 بجے درخواستوں پر سماعت کرے گا۔ چیف جسٹس نے عہدہ سنبھالنے کے فوری بعد اس کیس کی سماعت کے لیے فل کورٹ تشکیل دینے کا حکم دیا تھا 

واضع رہے کہ پی ڈی ایم دور میں منظور کیے گئے سپریم کورٹ پریکٹس اینڈ پروسیجر ایکٹ کے خلاف عدالت عظمیٰ میں ایک مقدمہ کئی ماہ سے زیر التوا ہے۔سابق چیف جسٹس عمرعطا بندیال کی سربراہی میں8 رکنی بینچ نے سپریم کورٹ بارایوسی ایشن کی درخواست حکم امتناع جاری کیا تھا۔ اس کے بعد سماعت غیرمعینہ مدت تک کے لیے ملتوی کردی گئی تھی۔

پی ڈی ایم دور حکومت میں بینچز کی تشکیل کے حوالے سے سپریم کورٹ پریکٹس اینڈ پروسیجر کے نام سے ایک قانون منظور کیا گیا تھا جس میں کہا گیا کہ عدالت عظمیٰ کے سامنے کسی وجہ، معاملہ یا اپیل کو چیف جسٹس اور دو سینئر ترین ججز پر مشتمل ایک کمیٹی کے ذریعے تشکیل دیا گیا بینچ سنے گا اور اسے نمٹائے گا، کمیٹی کے فیصلے اکثریت سے کیے جائیں گے۔

ملک میں ماہانہ بنیادوں پر مہنگائی کی شرح میں میں 2 فیصد کا اضافہ ہوا ہے۔ 

ادارہ شماریات نے ماہانہ مہنگائی کے اعدادوشمار جاری کردیئے جس کے مطابق مہنگائی کی مجموعی شرح ماہ ستمبر 31.4 فیصد ریکارڈ کی گئی اور اس دوران شہروں کی نسبت دیہی علاقوں میں مہنگائی کی شرح میں زیادہ اضافہ ہوا۔

ادارہ شماریات نے اپنی رپورٹ میں بتایا کہ شہروں میں مہنگائی میں 1.7 فیصد اور دیہی علاقوں میں 2.5 فیصد بڑھی جب کہ شہری علاقوں میں خوراک کی مہنگائی 33.9 فیصد ریکارڈ کی گئی۔

ادارہ شماریات کی رپورٹ میں مزید بتایا گیا کہ دیہی علاقوں میں خوراک کی مہنگائی 35.4 فیصد ریکارڈ کی گئی،  گزشتہ مالی سال ستمبر میں 23.2 فیصد ریکارڈ کی گئی تھی جب کہ جولائی تا ستمبر مہنگائی کی اوسط شرح 29.04 فیصد کی ریکارڈ کی گئی ہے۔

رپورٹ کے مطابق ایک سال میں چینی کی قیمت میں 95 فیصد اضافہ ہوا ہے جبکہ گندم کی قیمت میں 81.29 فیصد کا اضافہ دیکھنے میں آیا ہے، اسی طرح مصالحہ جات کی قمیتوں میں 78.77فیصد اور چائے کی قیمت میں 78.3فیصد اضافہ ہوا ہے۔

دوسری جانب نگراں وفاقی کابینہ کی اقتصادی رابطہ کمیٹی کا اجلاس کل طلب کرلیا گیا۔ ای سی سی کا اجلاس نگران وزیر خزانہ ڈاکٹر شمشاد اختر کی زیر صدارت ہوگا جس میں ملک کی موجودہ معاشی صورتحال زیر غور آئے گی

لاہور ہائیکورٹ راولپنڈی بنچ نے پولیس کو ایک ہفتے میں شیخ رشید کو پیش کرنے کا حکم دے دیا۔

لاہور ہائیکورٹ راولپنڈی بنچ کے جسٹس صداقت علی خان نے سابق وزیر داخلہ شیخ رشید کی حراست کے خلاف دائر درخواست پر سماعت کی، جس سلسلے میں آر پی او راولپنڈی سید خرم علی عدالت میں پیش ہوئے۔ پولیس نے عدالت کو بتایا کہ شیخ رشید کا بھتیجا اور ملازم واپس آ چکے ہیں۔

درخواست گزار کے وکیل نے عدالت کو بتایا کہ شیخ رشید کو گھر سے گرفتار کرکے گولڑہ میں انٹیلیجنس دفتر منتقل کیا گیا، انہیں منتقل کرنے کی وڈیوز بھی موجود ہے۔

عدالت نے ریجنل پولیس آفیسر کی رپورٹ مسترد کرتے ہوئے ریمارکس دیئے کہ آر پی اونے حد پار کردی ہے، شیخ رشید کو آئندہ ہفتے تک عدالت پیش کریں، ورنہ گرفتارکرنے والے ایس ایس پی آپریشن، ڈی ایس پی ، 4 ایس ایچ اوزکیخلاف مقدمہ درج ہوگا۔

جسٹس صداقت علی خان نے ریمارکس دیئے کہ آر پی او صاحب آپ کو ایک ہفتہ کی آخری وارننگ ہے، شیخ رشید نہ ملے تو تمام افسران کیخلاف میں خود مقدمہ درج کراؤں گا

آر پی او نے عدالت سے مزید 15 دن کا وقت مانگ لیا جس پر عدالت نے کہا کہ 15 دن بہت زیادہ ہیں یہ عام معاملہ نہیں، دو دن کی بھی مہلت بہت زیادہ ہوگی۔

جسٹس صداقت علی نے کہا کہ وکیل درخواست گزار سردار عبدالرازق کے کہنے پر مزید 7 دن کی مہلت دیتا ہوں، شیخ رشید ایک ہفتے کے اندر پیش نہ ہوئے تو عدالت ایف آئی آرکا حکم دے گی۔

بعد ازاں عدالت نے کیس کی سماعت ایک ہفتے تک ملتوی کر دی