تفصیلات کے مطابق آرمی چیف جنرل قمرجاویدباجوہ  نےسیدعلی گیلانی کےانتقال پراظہارافسوس کیا ہے ، ڈی جی آئی ایس پی آر کے مطابق آرمی چیف جنرل قمرجاویدباجوہ   نے اپنے پیغام میں کہاکہ کشمیرکی آزادی کےسرخیل سیدعلی گیلانی کی ناگہانی وفات پرگہراصدمہ پہنچا، سیدعلی گیلانی جدوجہدآزادی کشمیرکےسرکردہ لیڈرتھے۔ انہوں نے کہاکہ سیدعلی گیلانی نےپوری زندگی جدوجہدآزادی کشمیرکیلئےصرف کی،سیدعلی گیلانی کی جدوجہدبھارتی قبضےکیخلاف عملی مثال تھی،سیدعلی گیلانی کاخواب،مشن کشمیریوں کےحق خودارادیت تک زندہ رہےگا۔

 وفاقی وزیر خارجہ شاہ محمود قریشی نے سماجی رابطے کی ویب سائٹ  ٹوئٹر  پر پیغام میں لکھا کہ سیّد علی گیلانی کے انتقال پر پاکستان افسوس کا اظہار کرتا ہے، وہ تشدد کے باوجود کشمیر کی آزادی کی تحریک میں صدا بلند کرتے رہے۔ وہ قابض انتظامیہ کی طرف سے گھر پر نظر بند ہونے کے باوجود کشمیر کے حقوق کے لیے لڑتے رہے۔ اللہ پاک ان کی روح کو سکون عطا فرمائے اور آزادی کے خواب کو حقیقت بنائے۔

وفاقی وزیر داخلہ شیخ رشید نے اپنے پیغام میں کہا کہ  حریت رہنما سید علی گیلانی کی وفات پر گہرے رنج او غم کااظہار کرتا ہوں، لواحقین کے ساتھ اظہار ہمدری؛ کشمیری قوم سے اظہار یکجہتی کرتا ہوں۔ کاش مقبوضہ وادی جا سکوں اور گیلانی صاحب کی تدفین میں شامل ہوسکوں۔ پوری کشمیری قوم کے غم میں برابر کا شریک ہوں۔

‎پاکستان مسلم لیگ (ن) کے صدر اور قائد حزب اختلاف شہبازشریف کا سید علی گیلانی کی وفات پر شدید اظہار رنج وغم اور افسوس  کااظہار کرتے ہوئے کہاکہ ‎بطل حریت سید علی گیلانی کی وفات سے آزادی جموں وکشمیر کا ایک تاریخ ساز عہد تمام ہوا،‎سربلند سرخرو سید علی گیلانی نے پاکستان اور کشمیریوں سے وفا کا حق اداکیا ۔ انہوں نے کہاکہ ‎مرد آہن سید علی گیلانی ’ہم پاکستانی ہیں، پاکستان ہمارا ہے‘ کا انقلاب آفریں نعرہ بلند کرتے سفرآخرت پر روانہ ہوئے ، وہ ایک عظیم مجاہد، پختہ نظریاتی وابستگی کا چراغ، باعمل وباکردار صاحب بصیرت قائد تھے، ان کی رحلت بڑا نقصان ہے ،تمام عمر آزادی جموں وکشمیر کا پرچم تھامے رہے، مرد درویش نے حریت کی ایک تابناک تاریخ رقم کی ، زنداں ، جھوٹے مقدمات، جبرواستبدادکا کوئی ہتھکنڈا ان کے عزم صمیم کو متزلزل نہ کرسکا۔

پاکستان پیپلز پارٹی کے چیئر مین بلاول بھٹو زرداری نے کشمیری حریت رہنما سید علی گیلانی کے انتقال پر اظہار افسوس کرتے ہوئے ٹویٹر پر لکھا کہ سید علی گیلانی کشمیر میں آزادی کی تحریک کا دوسرا نام تھے۔ سید علی گیلانی کی زندگی جہدِ مسلسل کا ایک استعارہ تھی۔

وزیراعلیٰ پنجاب عثمان بزدار نے سیّد علی گیلانی کے انتقال پر افسوس کا اظہار کرتے ہوئے کہا  کہ کشمیری حریت رہنما سید علی گیلانی کا انتقال ایک عہد کا خاتمہ ہے، سید علی گیلانی مرحوم نے آزادی کشمیر کو نئی جلا بخشی۔سید علی گیلانی جیسے بہادر اور جرأت مند رہنما صدیوں بعد پیدا ہوتے ہیں ، سید علی گیلانی کی مقبوضہ جموں و کشمیر کی آزادی کے حوالے سے عظیم قربانیوں کو ہمیشہ یاد رکھا جائے گا۔

جماعت اسلامی کے امیر سراج الحق نے ٹویٹر پر لکھا کہ سیّد علی گیلانی گزشتہ اور اس صدی کےعظیم مجاہدآزادی، سب سےبڑے پاکستانی اور دنیا بھر کےحریت پسندوں کےلیےامید و حوصلےکا مرکز تھے۔انہوں نے لکھا کہ پاکستان آج اپنے سب سے وفادار بیٹے سے محروم ہوا ہے۔ بھارتی سامراج کے سامنے ان کی جدوجہد تاریخ میں ایک ضرب المثل کے طور پر ہمیشہ موجود رہے گی۔

وزیراعظم آزاد کشمیر عبد القیوم خان نیازی اور صدر آزاد کشمیر بیرسٹر سلطان نے بھی سینئر حریت رہنما سیّد علی گیلانی کے انتقال پر افسوس کا اظہار کیا۔