پاکستان اٹلی کے ساتھ دو طرفہ تعلقات کو اہمیت دیتا ہے: وزیر خارجہ

تفصیلات کے مطابق پاکستان اور اٹلی کے وزرائے خارجہ کے درمیان وفود کی سطح پر باضابطہ مذاکرات بھی ہوئے جس میں افغانستان اور خطے کی صورتحال سمیت باہمی دلچسپی کے امور پر بھی تبادلہ خیال کیا گیا۔

شاہ محمودقریشی نے مہمان وزیر خارجہ لیوگی دے مایو سے کہا کہ پاکستان گزشتہ چار دہائیوں سے افغان خانہ جنگی کے مضمرات کا سامنا کر رہا ہے وزیراعظم افغان صورتحال پریورپی یونین کے بہت سے ممالک کے ساتھ رابطے میں ہیں۔

وزیرخارجہ نے کہا کہ افغانستان میں اگست کے وسط میں رونما ہونے والی تبدیلیوں نے سب کو ورطہ حیرت میں ڈال دیا ہے، پاکستان افغان شہریوں کی جان و مال کے تحفظ کے ساتھ افغانستان میں اجتماعیت کی حامل حکومت کا متمنی ہے۔

وزیر خارجہ نے ملاقات میں زور دیا کہ عالمی برادری افغانوں کے ساتھ یکجہتی کا مظاہرہ کرے،خانہ جنگی اور مہاجرین کی یلغار جیسے چیلنجز پر قابو پانے کے لیے افغانوں کی مالی معاونت بھی ضروری ہے۔

انہوں نے کہاہے کہ افغانستان میں قیام امن کا فائدہ پورے خطے کو یکساں طور پر ہو گا،پاکستان نے مختلف ممالک کے 12000 شہریوں کو کابل سے انخلاء میں معاونت فراہم کی اور پاکستان، انخلاء کے عمل میں ‏مدد کا سلسلہ جاری رکھنے کیلئے پر عزم ہے

 شاہ محمود قریشی نے اپنے اطالوی ہم منصب سے کورونا کے دوران اٹلی میں ہونے والی ہلاکتوں پر افسوس کااظہار بھی کیاہے۔

اطالوی وزیر خارجہ نے افغانستان سے انخلاء کے عمل میں اطالوی شہریوں کی معاونت پر پاکستانی قیادت کا شکریہ بھی ادا کیا‎ہے۔