کراچی  :  شہر کے مختلف علاقوں میں رات گئے موسلادھار بارش

تفصیلات کے مطابق کراچی  کے مختلف علاقوں سرجانی،گلشن حدید، اسٹیل ٹاؤن ، یونیورسٹی روڈ، نیپاچورنگی، سفاری پارک، شاہراہ فیصل اور گورا قبرستان، ڈیفنس ڈیفینس، صدر اور اطراف کے علاقوں میں بادل برسے۔شہر  بھر میں تیز ہواؤں کے ساتھ موسلادھار بارش کے بعدپانی کھڑا ہوگیا ۔

بارش کا سلسلہ آج دن بھر اور کل بھی جاری رہنے کی پیش گوئی کی گئی ہے۔ آج بھی موسم جزوی ابر آلود رہے گا،سمندری ہوائیں بند ہونے اور ہوا میں نمی کا تناسب زیادہ ہونے کے سبب گرمی کی شدت زیادہ محسوس کی جارہی ہے۔ محکمہ موسمیات کا کہنا ہے کہ نوری آباد سے بحیرہ عرب تک بارش برسانے والے بادل کا سلسلہ موجود ہے جبکہ تیز بارش کراچی کے اوپر سپر سیل کی وجہ سے ہوئی۔ بارش کے بعد  شہر کے مختلف علاقوں میں بجلی کی فراہمی معطل ہوگئی  ۔

اس حوالے سے ترجمان کے الیکٹرک نے کہا ہے کہ کراچی کے مختلف علاقوں میں احتیاطی طور پر بجلی بند کی گئی ہے، بارش کی صورت میں شہری برقی آلات کے استعمال میں احتیاط کریں۔

محکمہ موسمیات نے کراچی ، حیدرآباد، شہید بینظیرآباد،تھر پارکر، عمرکوٹ،سانگھڑ، میر پور خاص بدین اور ٹھٹھہ میں 9 سے 11 ستمبر تک بارشوں کی پیشگوئی کی ہے ۔