ایم اے او کالج: طالبہ ہراسگی کے معاملے نے نیا رخ اختیار کرلیا

تفصیلات کے مطابق  لیکچرار پہ الزام لگانے والی طالبہ اپنی شکایت سے دستبردار ہوگئی ہے،طالبہ نے تحریری طور پر محکمہ ہائر ایجوکیشن میں درخواست جمع کرادی ہے۔

طالبہ نے درخواست میں موقف  اختیار کیا ہے کہ  مجھے لیکچرار نے حراساں نہیں کیا، ہم ایک دوسرے کے ساتھ موبائل میسجز پر رابطے میں تھے، جو کچھ ہوا وہ غلط فہمی کی بنیاد پر ہوا۔

طالبہ نے کہا ہے کہ میڈیا پہ چلنے والی خبریں میرے لئے پریشان کن ہیں۔براہ کرم اس معاملے کو ختم کیا جائے میں مزید کارروائی کی خواہاں نہیں۔اگر محکمہ ضروری سمجھے تو لیکچرار کا تبادلہ کردے۔

دوسری جانب محکمہ ہائر ایجوکیشن نے لیکچرار کا ایم اے او کالج سے تبادلہ کردیا گیا،لیکچرار کو فوری طور پر محکمہ ہائر ایجوکیشن رپورٹ کرنے کی ہدایات جاری کردیں گئیں۔

اس سے قبل  ایم اے او کالج کی  طالبہ نے کالج لیکچرار پر طالبات کو جنسی ہراساں کرنے کا الزام عائد کیا تھا۔ سائیکالوجی کی ایک طالبہ نے کالج انتظامیہ کو تحریری طور پر شکایت کی  اور کہا تھا کہ  اسے اور اس کی ساتھی طالبہ کو ایک لیکچرار کی جانب سے  ہراساں کیا جاتا رہا ہے۔

 طالبہ  کا کہنا تھا کہ  لیکچرار کی جانب سےکہا گيا کہ نمبر لگوانے ہیں تو باہر ملاقات کریں ، نازیبا پیغامات بھی بھیجے گئے۔

واضح  رہےکہ ایم اے او کالج میں پہلے بھی ایک لیکچرار پر طالبہ کو ہراساں کرنے کا الزام لگایا گیا تھا، انکوائری میں لیکچرار کو بے گناہ قرار دیا گیا تھا لیکن پرنسپل نے بےگناہی کا لیٹر جاری نہ کیا، بعد ازاں انگریزی کے لیکچرار نے خودکشی کرلی تھی۔