گزشتہ تین برسوں میں پاکستان نے اندرونی و بیرون محاذ پر کئی کامیابیاں حاصل کیں:صدرمملکت

تفصیلات کے مطابق قومی اسمبلی کے چوتھے پارلیمانی سال کے آغاز کے موقع پر پارلیمان کے دونوں ایوانوں کے مشترکہ اجلاس کے دوران پارلیمان میں صدر کے خطاب کے دوران وزیراعظم عمران خان بھی ایوان میں موجود تھے، ان کے علاوہ قائد حزب اختلاف شہباز شریف، پاکستان پیپلز پارٹی کے چیئرمین بلاول بھٹو زرداری اور سابق وزیراعظم شاہد خاقان عباسی بھی شریک ہوئے۔

اس کے علاوہ آزاد کشمیرکے صدر، سروسز چیفس اور مختلف ممالک کے سفیراور چاروں صوبوں کے گورنرز بھی مہمانوں کی گیلری میں موجود تھے۔

صدر مملکت کا کہنا تھا کہ ملکی ترسیلات زر19.4 ارب ڈالر کی ریکارڈ سطح پر پہنچ گئیں، پاکستان اسٹاک ایکسچینج نے بہتر کارکردگی کے حوالے سے ماضی کے تمام ریکارڈ توڑ ڈالے اور دنیا بھر میں چوتھی بہترین سٹاک مارکیٹ قرار پائی ہے۔

ان کا کہنا تھاکہ پاکستان میں کاروبار شروع کرنے میں آسانی کے حوالے سے 28 درجے بہتری آئی ہے جب کہ سرمایہ کاروں کے اعتماد میں 60 فیصد اضافہ ہوا ہے۔

انہوں نے کہا کہ ایف بی آر نے گزشتہ سال کے مقابلے میں 18 فیصد زائد ٹیکس محاصل اکٹھے کیے، تمام اعدادو شمار سرمایہ کاروں اور عوام کی جانب سے حکومت پر مکمل اعتماد کا مظہرہیں۔

عارف علوی کا کہناتھا کہ غریب اور متوسط طبقے کیلئے اپنی چھت کی فراہمی کیلئے خصوصی ہاؤسنگ سکیم شروع کی گئی۔ حکومتی ترغیبات کے باعث تعمیراتی شعبے میں 47ارب مالیت کے منصوبے رجسٹرڈ ہو چکے ہیں۔

ان کا کہنا تھا کہ حکومتی اقدامات کے باعث آئی ٹی برآمدات میں 47 فیصد اضافہ ہوا ہے، پاکستان میں نوجوانوں کو ہنرمند بنانے کیلئے متعدد پروگرامز کا اجراء کیا جاچکا ہے۔

صدر مملکت کا کہنا تھاکہ اب تک 17 لاکھ نوجوانوں کو فنی تربیت فراہم کی جا چکی ہے،حکومتی کارکردگی اور کامیابیوں کو شور شرابے کے ذریعے نہیں روکا جا سکتا۔

صدر عارف علوی کے خطاب کے دوران اپوزیشن نے شور شرابہ شروع کیا اور بعد ازاں بائیکاٹ کر کے ایوان سے چلے گئی۔