عمران خان کو چاروں صوبوں سے ناکامی اور شکست پر مبارکباد دیتی ہوں، مریم نواز

نائب صدر مسلم لیگ ن مریم نواز کا پریس کانفرنس میں کہنا ہے کہ   عمران خان کو چاروں صوبوں سے ناکامی اور شکست پر مبارکباد  دیتی ہوں۔ اللہ نے مسلم لیگ ن کو تینوں حلقوں میں فتح دی اس پر شکر ادا کرتے ہیں، نوشہرہ، ڈسکہ کے عوام کا شکریہ ادا کرنا چاہتی ہوں، وزیرآباد کے عوام کا بھی شکریہ، مسلم لیگ ن کے سپورٹرز اور لیڈرز کا بھی شکریہ ادا کرتی ہوں، کل مسلم لیگ ن کے کارکنوں نے ووٹ کی عزت کیلئے جنگ لڑی۔

مریم نواز نے کہا کہ   کل کے ضمنی الیکشن میں عوام جاگ رہے تھے اور رات تک ووٹ پر پہرہ دے رہے تھے، عوام چوکنا تھی اس وجہ سے ووٹ چوروں کو پکڑ لیا، عوام نے بڑی تعداد میں نکل کر اپنے ووٹ کا حق استعمال کیا، عوام نے ووٹ کو عزت دو کے بیانیے کوسپورٹ کیا، عوام ووٹ چوروں کے چہرے پہچانتے ہیں۔

لیگی رہنما مریم نواز نے کہا کہ   حکمران جماعت سوچ بھی نہیں سکتی تھی کہ وہ نوشہرہ سےہارجائیں گے، نوشہرہ  کے عوام ان سے نجات چاہتے ہیں، میاں صاحب کا بیانیہ  خیبر پختونخوامیں بھی مقبول ہورہا ہے، ان کو پتہ تھا کہ یہ ہاریں گے لیکن یہ پتہ نہیں تھا کہ اس بری طرح ہاریں گے۔

نائب صدر مسلم لیگ ن  مریم نواز نے پریس کانفرنس میں کہا کہ   یہ حکومت نہیں مافیا ہے،  پی ٹی آئی امیدوارکے لوگوں نےفائرنگ کی، پی ٹی آئی کے لوگوں کی فائرنگ کی وجہ سے دو افراد کی جانیں ضائع ہوئیں۔ پی ٹی آئی امیدوار اس کے بھانجے ،بھتیجوں نے فائرنگ کی۔ مریم نواز نے کہا کہ   جب ثبوت ہوتے ہیں تو دکھائے جاتے ہیں الزامات نہیں لگائے جاتے، یہ ناکام ہوئے تو ڈسکہ ،وزیرآباد میں پولنگ سست روی کا شکار کردی۔

 مریم نواز کا کہنا تھا کہ    ان کے وزیر ،مشیر پولنگ اسٹیشن کے اندر کیا کررہے تھے، ان کو اندر سے احکامات آئے تھے کہ پولنگ سست کردو، جہاں شیر جیت رہا تھا وہا ں پولنگ بند کردی گئی، وزیرآباد میں ایک پریزائڈنگ آفیسر ووٹنگ بیگ لے کر بھاگ رہا تھا،  ووٹ کے بیگ اٹھا کر بھاگنے کے باوجود ہارنے پر انہوں نے الیکشن کے عملے کو اٹھالیا، ہمیں پتہ چلا کہ 20سے 22پریزائدنگ آفیسر کو ہی غائب کردیا گیا۔مسلم لیگ ن کی رہنما کا کہنا ہے کہ   ابھی تک کوئی نہیں جانتا کہ پریزائڈنگ آفیسر کو کس نے کہاں رکھا، الیکشن کمیشن نے  کہا کہ حلقہ این اے 75 کے نتائج تاخیر سے موصول ہوئے، چیف الیکشن کمشنر نے آئی جی پنجاب  کو پریزائڈنگ آفیسر کو ڈھوڈنے  کا کہا، کہا گیا کہ شدید دھند کے باعث پریزائڈنگ آفیسر نہیں آسکتے۔

 مریم نواز نے پریس کانفرنس میں مزید کہا کہ    دھاندلی پر الیکشن کمیشن بھی چیخ پڑا ہے، پریذائیڈنگ آفیسرووٹوں کاتھیلالےکربھاگ رہاتھاعطاتارڑنےپکڑلیا، فائرنگ ہوئی، لوگ شہید ہوئے، ووٹ کے بیگ چوری ہوئے، انتظامیہ اور پنجاب حکومت کہاں تھی، الیکشن کمیشن کی پریس ریلیز حکومت کے خلاف بہت بڑی چارج شیٹ ہے۔