وزیراعظم عمران خان اور قازقستان کے صدر کی ملاقات، دوطرفہ تعلقات پر تبادلہ خیال 

تفصیلات کے مطابق دوشنبے میں وزیراعظم عمران خان اور قازقستان کے صدر کی ملاقات ہوئی ہے،دونوں رہنماؤں نے دوطرفہ تعلقات ،  اہم علاقائی اور بین الاقوامی امور پر تبادلہ خیال کیا ۔دونوں رہنماؤں نے تجارت، سرمایہ کاری سمیت مختلف شعبوں میں تعلقات بڑھنے پر اتفاق کیا۔

وزیر اعظم نے کہا کہ  پاکستان اپنی وسطی ایشیائی ممالک کے ساتھ رابطوں کو بڑھانے کے لیے پرعزم ہے۔وزیراعظم نے علاقائی انضمام کو فروغ دینے کے لیے زمینی اور فضائی راستوں کے ذریعے روابط بڑھانے پر زور دیا۔وزیراعظم نے پاکستان اور خطے کے لیے افغانستان میں امن اور استحکام کی اہمیت پر بھی زور دیا۔

وزیر اعظم عمران خان نے کہا کہ  عالمی برادری کو افغان عوام کی مدد، فوری انسانی ضروریات کو پورا کرنے اور معیشت کے استحکام کے لیے اقدامات کرنے چاہیے،  افغانستان میں پائیدار امن اور سلامتی علاقائی امن، رابطے اور ترقی میں کردار ادا کرے گی۔دونوں رہنماؤں نے اعلیٰ سطح کے سیاسی روابط کو بڑھانے پر اتفاق کیا۔

وزیراعظم نے قازقستان کے صدر دورہ پاکستان کی دعوت دی، قازقستان کے صدر نے بھی  وزیراعظم کو دورے کی دعوت دی۔

قبل ازیں  وزیراعظم عمران خان دو روزہ دورے پر تاجکستان پہنچ گئے تھے، تاجکستان پہنچے پر وزیراعظم عمران خان کا استقبال تاجک ہم منصب نے کیا ۔ وزیرخارجہ شاہ محمود قریشی ، وزیراطلاعات فواد چوہدری ، علی زیدی بھی وزیراعظم کے ہمراہ ہیں ، مشیر تجارت عبدالرزاق داؤد اور مشیر قومی سلامتی معید یوسف بھی وزیراعظم کے ساتھ دورے پر موجود ہ تھے ۔دورے کے دوران وزیراعظم 20 شنگھائی تعاون تنظیم کے اجلاس میں شرکت کی۔