الجیریا کے سابق صدر عبدالعزیز بوتفلیقہ  انتقال کر گئے

غیر ملکی خبر ایجنسی کے مطابق الجیریا کے سابق صدر عبدالعزیز بوتفلیقہ  کی عمر 84 برس  تھی ۔ عبدالعزیز بوتفلیقہ  نے 2019ء میں صدارت کا عہدہ چھوڑ دیا تھا۔ بوتفلیقہ  نے شمالی افریقہ کے اس  ملک پر دو دہائیوں تک حکومت کی ۔ان کے حامی انہیں جنگ آزادی کا ہیرو مانتے تھے ۔  1974 میں  اقوام متحدہ کی جنرل اسمبلی کے صدر کی حیثیت سے بوتفلیقہ  نے سابق فلسطینی رہنما یاسر عرفات کو خطاب کی دعوت دی ، جو فلسطینی کاز کی بین الاقوامی پہچان کی طرف ایک تاریخی قدم تھا۔

مرحوم عبدالعزیز نے چین کو اقوام متحدہ میں  نشست دینے کا مطالبہ کیا اور جنوبی افریقہ میں نسلی تعصب کے خلاف برسر پیکار رہے ۔  1980 کے اوائل میں ان پر بدعنوانی کا الزام لگایا گیا اور وہ خود ساختہ جلاوطنی میں چلے گئے ، جلاوطنی کے دوران انہوں نے  دبئی  کے حکمران خاندان کے  مشیر کا عہدہ سنبھالا ، بعداازاں ان کے اوپر لگنے والے کرپشن الزامات ختم کردئیے گئے ۔

1990 کی دہائی میں جب الجیریا واپس آئے تو الجیریا کی فوج اور مسلح جنگجوؤں کے درمیان جنگ  جاری تھی  جس  میں 2لاکھ سے زائد افراد ہلاک ہوچکے تھے جس کے بعد  فوج کی حمایت سے عبدالعزیز نے الیکشن جیتا ۔ 1999میں منتخب صدر نے اسلام پسندوں کے ساتھ جنگ بندی پر بات چیت کی اور ملک میں امن کی بحالی کے لیے قومی مفاہمت کا عمل شروع کیا ۔ عبدالعزیز کے دور  حکمرانی  میں الجیریا ترقی کی راہ پر گامزن ہوا اور عرب ممالک کے ساتھ اچھے تعلقات قائم کیے گئے  ۔2013 میں عبدالعزیز فالج کا دورہ پڑا جس کے بعد انہیں عوامی سطح پر شاذروناذر ہی دیکھا گیا تھا ۔ عبدالعزیز نے 20  سال الجیریا کے صدر کے طور پر خدمات انجام دیں۔ تاہم شدید عوامی احتجاج کے نتیجے میں  پانچویں مرتبہ صدارتی الیکشن میں حصہ لینے کا ارادہ ترک کردیا تھا۔  

عبدالعزیز بوتفلیقہ  الجیریا کے سیاسی تاریخ کے طویل ترین عرصے تک صدارت کے عہدے پر فائز رہنے والے پہلے حکمران تھے۔