نیوزی لینڈ کی اتنی فورسز نہیں جتنی انہیں سیکیورٹی دی تھی:  شیخ رشید

وفاقی وزیر داخلہ شیخ رشید احمد نے اسلام آباد میں پریس کانفرنس کرتے ہوئے نیوزی لینڈ ٹیم کے تھریٹ الرٹ سے متعلق سوال اٹھا دیے ۔  انہوں نے کہاکہ  تھریٹ الرٹ کا بتانے والےپانچ  ممالک اس وقت کہاں تھے جب سیکیورٹی ماہرین دورہ کررہے تھے اور چار دن سے ٹیم پریکٹس کر رہی تھی، اتنی نیوزی لینڈ کے پاس فورسز نہیں ہیں جتنی ہم نے  انہیں سیکیورٹی دی تھی۔

شیخ رشید نے کہا کہ ساری دنیا میں ہماری ایجنسیاں مضبوط ترین ہیں ، امن کیلئے ہمارے ہزاروں افراد جاں بحق ہوئے ۔ وفاقی وزیرداخلہ نے اپوزیشن پر تنقید کرتے ہوئے کہا کہ شیشے کے گھر میں بیٹھ کر پتھر نہ ماریں، ایک دن آئے گا جب ساری ٹیمیں پاکستان میں کھیلنے آئیں گی۔

شیخ رشید کا کہنا تھا کہ 2شناختی کارڈ یا پاسپورٹ والے افراد 31 اکتوبر تک اپنا ایک شناختی کارڈ اور ایک پاسپورٹ واپس کر دیں۔انہوں نے کہاکہ پاکستان ساری دنیا سے تعلقات بہتر رکھنا چاہتا ہے،  افغانستان سے ہم نے 16 ہزار لوگوں کا انخلا کیا ہے،4ہزار لوگ طورخم اور چمن بارڈر سے واپس گئے ہیں،ہمارا ایک ہی بیانیہ ہے کہ افغانستان میں استحکام اور امن ہو، وزیراعظم عمران خان نے ہمارا بیانیہ تاجکستان میں واضح بیان کیا ہے۔

 وفاقی وزیر نے کہاکہ ہرالیکشن کےبعد دھاندلی کا شورمچایا جاتا ہے،ہماری اپوزیشن انڈر19 کی ٹیم ہے،یہ اپوزیشن الیکشن کی تیاری میں نکل آئی ہے ، ای وی ایم پر حکومت سے بات کرے۔ ان کامزید کہناتھا کہ مولانا عبدالعزیز پر کئی ایف آئی آرز ہیں لیکن ہم پرامن طور پر حل چاہتے ہیں، بات چیت سے مسئلہ  حل ہوتا ہے تو ٹھیک، اگر قانون کو ہاتھ میں لیا گیا تو حکومت کو کمزور نہ سمجھا جائے۔ بھارت سے متعلق سوال پر وفاقی وزیر داخلہ نے کہاکہ انڈیا کے پاس شیخ رشید اور طالبان دو ہی ٹاپک ہیں، انڈیا کو کیا تکلیف ہے کہ شیخ رشید بارڈر کے دورے کر رہا ہے،میں لیپا بھی جاؤں گا، فوج میری ہے اور میں فوج کا ہوں ۔