اگلا الیکشن الیکٹرونک ووٹنگ کے ذریعے ہوگا،وزیرداخلہ شیخ رشید

جی این این کے پروگرام  "خبر ہے" میں گفتگوکرتے ہوئے وزیر داخلہ شیخ رشید نے کہا ہے کہ   اتنی نیوزی لینڈکی فوج نہیں جتنی ہم نے سکیورٹی پر لگادی، ہم نے پوری کوشش کی ۔انہوں نے کہا کہ میچ نہ ہونے سے کوئی قیامت نہیں آرہی، کل فواد چودھری اور میں ان کو پریس کانفرنس میں ایکسپوز کریں گے۔ہمارے امیج کو نقصان پہنچانے کی ناکام کوشش کی گئی ہے۔

وزیرداخلہ شیخ رشید نے پروگرام میں بتایا کہ  ہم ایک اہم خطے میں واقع ہیں،ہمیں کوئی تنہا نہیں کرسکتا، گلہ شکوہ نہیں کرناچاہئے،ہم خطے میں امن کیلئے کوشاں ہیں،ہم امن کے داعی ہیں،خطے میں امن واستحکام کے خواہاں ہیں۔

وزیر داخلہ کا مزید کہنا تھا کہ  اپوزیشن نے 52 جلسوں کاکہا ہے،وہ الیکشن مہم پر نکل گئی ہے،پیپلزپارٹی سندھ کی سیاست کھیل رہی ہے، ن لیگ پنجاب میں سیاست کررہی ہے،شہباز شریف ڈویژنل کنونشن کررہے ہیں۔

شیخ رشید نے کہا کہ  اگلا الیکشن الیکٹرونک ووٹنگ کے ذریعے ہوگا، اسمبلی کے ذریعے قانون پاس ہوگا اور عام انتخابات ای وی ایم سے ہوں گے، اوورسیز ملک میں زرمبادلہ کے سب سے بڑے سپورٹرہیں، اوورسیز کو بھی ملک کے سیاسی فیصلوں کاحق دیاجائےگا۔