نیشنل ٹی ٹوئنٹی میچز: این سی او سی کا  گراؤنڈ میں شائقین کی تعداد بڑھانے کا فیصلہ

ذرائع کے مطابق  اسد عمر کی زیر صدارت  نیشل کمانڈ اینڈ آپریشن سینٹر (این سی او سی) کا اجلاس ہوا ، ملک میں کورونا کیسز، ویکسینیشن مہم کی صورتحال پر غور کیا گیا۔

ذرائع کا کہنا ہے کہ  ٹی ٹوئنٹی میچز کیلئے گراؤنڈ میں شائقین کی تعداد بڑھانے کا فیصلہ کیا ہے،راولپنڈی کرکٹ اسٹیڈیم میں 50 فیصد شائقین میچ دیکھ سکیں گے۔

این سی او سی کی جانب سے جاری کردہ مراسلے میں کہا گیا ہے کہ ویکسینیٹڈ افراد کو کرکٹ سٹیڈیم میں میچ دیکھنے کی اجازت ہو گی، پی سی بی ویکسینیٹڈ افراد کو ٹکٹ کے اجراء کیلئے میکنزم تیار کرے گا، پی سی بی کرکٹ میچز کیلئے سیکورٹی انتظامات کی ذمہ دار ہو گی،پی سی بی کرکٹ گراؤنڈ میں ایس او پیز پر عملدرآمد کی ذمہ دار ہو گی،کرکٹ سٹیڈیم میں تماشائیوں کیلئے ماسک، سماجی فاصلہ رکھنا لازم ہو گا۔

ذرائع کے مطابق این سی او سی نے وزارت صحت، داخلہ، چیف سیکرٹری پنجاب کو مراسلہ بھجوا دیا ہے،این سی او سی نے چیئرمین، سی ای او، سی او او کو مراسلہ ارسال کر دیا۔

خیال رہے کہ  نیشنل ٹی ٹوئنٹی کپ میں آج  سندھ کا مقابلہ بلوچستان جبکہ سدرن پنجا ب کا مقابلہ ناردرن پنجاب سے ہوگا۔ دن کے پہلے میچ میں سندھ اور بلوچستان کی ٹیمیں 3 بجے مد مقابل ہوں گی، جبکہ دوسرے میچ میں سدرن پنجاب اور ناردرن کی ٹیمیں شام ساڑھے 7 بجے  میدان میں اتریں گی ۔

پوائنٹس ٹیبل پر سرفراز احمد کی سندھ کی ٹیم 2 میچز کھیل کر 4 پوائنٹس کے ساتھ ٹاپ پوزیشن پر ہے۔ بابر اعظم کی سینٹرل پنجاب کی ٹیم نے 3 میچز کھیلے اور 4 پوائنٹس حاصل کیے  ہیں، وہ دوسرے نمبر پر ہے۔ محمد رضوان کی خیبر پختون خوا کی ٹیم 3 میچز کھیل کر 4 پوائنٹس کے ساتھ تیسرے نمبر پر ہے۔شاداب خان کی ناردرن کی ٹیم نے 3 میچز کھیلے، وہ 1 میچ میں کامیابی اور 1 میں شکست کے بعد ٹیبل پر چوتھی پوزیشن پر ہے۔ امام الحق کی بلوچستان ٹیم نے 3 میچز کھیلے اور 2 میں ناکام رہی، جبکہ 2 پوائنٹس حاصل کیے  اور پانچویں نمبر پر ہے۔صہیب مقصود کی سدرن پنجاب کھیلے گئے تینوں میچز میں شکست کے بعد آخری نمبر پر ہے۔