الوداع لیجنڈ ، بھارتی کامیڈین  کپل شرما افسردہ

تفصیلات کے مطابق بھارت کے معروف کامیڈین  کپل شرما نے سماجی رابطے کی ویب سائٹ ٹوئٹر پر پیغام میں افسوس کا اظہار کرتے ہوئے لکھا    " الوداع لیجنڈ "۔ کپل شرما ہمیشہ سے ہی کامیڈی کے بے تاج بادشاہ عمر شریف کے  پرستاروں میں شامل رہے ہیں۔ کپل شرما کئی بار   یہ کہہ چکے ہیں کہ انہوں نے کامیڈی عمر شریف سے ہی سیکھی۔

Alvida legend ?may your soul Rest In Peace ??? #UmerShareef pic.twitter.com/ks4vS4rdL0

— Kapil Sharma (@KapilSharmaK9) October 2, 2021

واضح رہے کہ لیجنڈ کامیڈین عمر شریف طویل علالت کے بعد جرمنی کے اسپتال میں انتقال کر گئے۔اداکار عمر شریف 4 روز سے جرمنی کے اسپتال میں داخل تھے ، انہیں کراچی سے واشنگٹن علاج کیلئے پہنچایا جارہا تھا لیکن ناساز طبیعت کے باعث انہیں جرمنی کے اسپتال میں ہی داخل کردیا گیا تھا۔ لیجنڈری اداکار و کامیڈین عمر شریف کافی عرصے سے عارضہ قلب ، گردے اور دیگر مختلف بیماریوں میں مبتلا تھے۔

کامیڈی کنگ عمر شریف  19  اپریل 1955 کو کراچی کے علاقے لیاقت آباد میں پیدا ہوئے۔ عمر شریف نے 14 سال کی عمر سے اسٹیج پر اداکاری شروع کی اور دیکھتے ہی دیکھتے کامیڈی کی دنیا پر چھاگئے ۔ عمر شریف  نے کامیڈی کا جو منفرد انداز متعارف کرایا اُس میں عوامی لہجہ، چوٹی کے اداکاروں کی نقل، طنز و مزاح سے بھرپور چٹکلے اور جگت بازی سمیت وہ سب کچھ تھا جس کا نظارہ کرتے ہی شائقین ہنستے ہنستے لوٹ پوٹ ہوجاتے۔

کامیڈین عمر شریف  تھیٹر اور اسٹیج  ڈراموں کے بے تاج بادشاہ تھے، انہوں نے ٹی وی اور فلموں میں بھی اپنے فن کا مظاہرہ کیا لیکن ان کی مقبولیت کی بڑی وجہ مزاحیہ اسٹیج ڈرامے ہیں۔ عمرشریف صرف پاکستان ہی میں مقبول نہیں بلکہ ہندوستان سمیت جہاں جہاں اردو بولی اور سمجھی جاتی ہے وہاں ان کے مداح موجود ہیں۔

عمر شریف کی خدمات کے عوض انہیں نگار ایوارڈ، تمغہ امتیاز سمیت کئی اعزازات سے بھی  نوازا گیا۔