کروز شپ منشیات کیس: بالی ووڈ پروڈیوسر کے گھر اور دفتر پر چھاپہ

ممبئی: بھارتی نارکوٹکس کنڑول بیورو نے کروز شپ کیس میں بالی ووڈ پروڈیوسر کے گھر اور دفتر پر چھاپہ مارا ہے ۔ 

غیر ملکی میڈیا کے مطابق کروز شپ منشیات کے کیس میں شاہ رخ خان کے بیٹے آریان کی دگر ملزمان کے ساتھ گرفتاری کے بعد این سی بی کی جانب سے چھاپوں کا سلسلہ جاری ہے ۔ 

میڈیا رپورٹس کے مطابق نارکوٹکس بیورو کے حکام نے کیس کے سلسلے میں بھارتی فلم ساز امتیاز کھتری کے گھر اور دفتر پر بھی چھاپہ مارا۔ این سی بی نے جمعے کے روز ممبئی کے علاقے باندرہ میں امتیاز کھتری کے گھر اور دفتر پر چھاپہ مارا جس کی اطلاع نارکوٹکس حکام نے ہفتے کے روز باضابطہ طور پر دی۔

میڈیا رپورٹس کےمطابق این سی بی حکام نے دورانِ تفتیش ملزم اچت کمار کی نشاندہی پر امتیاز کھتری کے گھر اور دفتر پر چھاپہ مارا۔ این سی بی حکام نے امتیاز کھتری کو ہفتے کو دفتر میں پیش ہونے کا بھی حکم دیا ہے۔ اس موقع پر این سی بی ممبئی زون کے ڈائریکٹر کا کہنا تھا کہ نارکوٹکس کنٹرول بیورو اور پراسیکیوشن اس کیس کو منطقی انجام تک پہنچائیں گے۔

انہوں نے کہا کہ ہمارا کیس مضبوط ہے اور اسے سیشن کورٹ میں پیش کیا جائے گا۔