مولانا اپنی ایک پلیٹ حلوے کے لیے پوری دیگ کیوں الٹانا چاہتے ہیں: فواد چوہدری

تفصیلات کے مطابق وفاقی وزیر اطلاعات کا کہنا تھا کہ مولانا اپنی سیاسی انا کی تسکین کیلئے  جمہوری نظام سے نہ کھیلیں،انہیں سابقہ دور میں قومی اسمبلی میں کی گئی اپنی تقاریر کیوں نہیں یاد آرہیں؟ 

فواد چوہدری کا کہنا تھا کہ نواز شریف اپنے بھائی اور مریم نواز اپنے چچا شہباز شریف کے ساتھ وہی سلوک کر رہے ہیں جو زرداری اور بلاول نے مل کرمولانا فضل الرحمان سے کیا ہے۔ 

وفاقی وزیر اطلاعات کا مزید کہنا تھا کہ مولانا کو اپنی یہ عزت افزائی کبھی نہیں بھولنی چاہیے مولانا صاحب اور شہباز شریف مل کر انجمن متاثرین بنالیں۔

یاد رہے کہ کچھ دیر قبل میڈیا سے گفتگو کرتے ہوئے مولانا فضل الرحمان کا کہنا تھا کہ پی ڈی ایم اپنے مقاصد کیلئے متحرک ہے،14اکتوبر کو پشاور میں کانفرنس کا اعلان کیا ہے جبکہ 16اکتوبر کو فیصل آباد میں ایک تاریخی اجتماع ہو گا۔

پی ڈی ایم سربراہ کا کہنا تھا کہ 31 اکتوبر کو ڈیڑہ غازی خان میں جلسہ ہو گا ،حکومت قہر بن کر اس وقت مسلط ہے،حکومت سے خلاصی کی ہر آدمی کی ضرورت بن چکی ہے۔

مولانا فضل الرحمان کا کہنا تھا کہ تمام ادارے تباہ ہو چکے ہیں،جو ملازمین برطرف کیے گئے ہیں وہ مظاہرہ کر رہے ہیں ان کیساتھ یکجہتی کا اظہار کرتے ہیں۔

ان کا کہنا تھا کہ غریب آدمی آج اناج خریدنے کے قابل نہیں رہا ہے،یہ ایک سنجیدہ صورتحال ہے۔

مولانا فضل الرحمان کا مزید کہنا تھا کہ مودی ہمیں اتنا نقصان نہیں پہنچا سکتا تھا جتنا عمران خان نے پہنچایا ہے۔