ملک بھر کے تعلیمی ادارے 100 فیصدحاضری کےساتھ کھل گئے

تفصیلات کے مطابق  این سی او سی نے کورونا کے پھیلاؤ میں کمی کے بعد  ملک بھر میں بچوں کے سکول نارمل حالات کے مطابق کھولنے کا فیصلہ کیا تھا۔ اس فیصلے کے تحت آج  سے اسکول ، کالجز اوریونیورسٹیاں بھی معمول کے مطابق  کھل گئیں ۔ 

اس سے قبل تعلیمی اداروں میں کورونا ایس او پیز کے تحت اسکولوں میں پچاس فیصد حاضری کے ساتھ ایک دن چھوڑ کر بچوں کی کلاسیں لی جارہی تھیں،  تاہم اب تعلیمی ادارے ہفتہ وار کھلیں گے ۔  پنجاب بھر میں بچوں کے سکولوں میں نارمل کلاسز کا آغاز ہوگیا  ہے، محکمہ تعلیم پنجاب کے مطابق آج سے سکولوں میں سو فیصد حاضری شروع کی جارہی ہے سکولوں میں کھیلوں کی سرگرمیاں، بزم ادب اور دیگر غیر نصابی سرگرمیاں بھی بحال ہو گئی ہیں ۔

این سی او سی کی جانب سے  12 سال اور زائد عمر کے طلبا کیلئے ویکسی نیشن لازمی قرار دے دی گئی ہے  ، سربراہ این سی او سی کا کہنا ہے کہ وائرس سے بچاؤ کی احتیاطی تدابیر پر عمل کرنا ہوگا۔ صوبائی اور ضلعی سطح پر مانیٹرنگ ٹیمیں ایس او پیز پر عملدرآمد یقینی بنائیں گی۔

واضح رہے کہ ملک میں چوبیس گھنٹے کے دوران وائرس کے 43ہزار389ٹیسٹ کیے گئے جن میں مثبت کیسز کی شرح 2.31فیصد رہی۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  ملک میں کورونا وائرس کی  چوتھی  لہر کے دوران  گزشتہ چوبیس گھنٹے  میں  کورونا کے ایک ہزار04 نئے کیسز سامنے  آئے  اور 28اموات کی تصدیق ہوئی۔ملک میں  اموات کی مجموعی تعداد28ہزار134ہوگئی ہے،جبکہ متاثرہ افراد کی مجموعی تعداد 12لاکھ58ہزار959تک پہنچ گئی ہے۔  این سی اوسی کے مطابق ملک میں کورونا کے فعال کیسز کی تعداد42ہزار 263 ہوگئی  ۔