آزادکشمیر ، پیپلز پارٹی رکن اسمبلی چوہدری یاسین نے گرفتاری دے دی

تفصیلات کے مطابق آزاد کشمیر کے حلقہ ایل اے 12 میں فائرنگ سے سیاسی پارٹی کے 2 کارکنوں کے قتل کے کیس میں پیپلزپارٹی کے آزاد کشمیر کے صدر اور رکن  اسمبلی چوہدری یاسین نے ازخود گرفتاری دے دی ۔ چوہدری یاسین پر مٹھی جنڈ قتل کیس کا مقدمہ درج ہے۔ 

 خیال رہے کہ  25 جولائی کو حلقہ ایل اے 12 چڑھوئی کے پولنگ اسٹیشن نمبر 92 مٹھی  میں عام انتحابات کے دوران 2 افراد قتل ہوئے تھے۔ جس کے بعد سے پیپلزپارٹی کے رہنما چوہدری یاسین نے ضمانت قبل از گرفتاری کرا رکھی تھی۔

چوہدری یاسین نے گرفتاری سے قبل میڈیا سے گفتگو کرتے ہوئے کہا کہ قانونی جنگ لڑیں گے، میں احتجاج کے طور پر اپنی گرفتاری دے رہا ہوں ، جج نے میری عدم موجودگی میں فیصلہ سنایا، عوامی عدالت کے بعد آزاد کشمیر کی عدالت سے بھی سر خرو ہوں گا۔

کوٹلی کی عدالت نے گزشتہ روز چوہدری یاسین کی  درخواست ضمانت مسترد کردی تھی ۔ اس سے قبل چوہدری یاسین نے اپنی ضمانت قبل از گرفتاری کروائی تھی اور ان کے دو بیٹے جیل میں ہیں۔