گرفتاری سے نہیں ڈرتی ، عمران خان آئینی وزیراعظم ہیں اورنہ ہی منتخب : مریم نواز  

تفصیلات کے مطابق مسلم لیگ نون کی نائب صدر مریم نواز نے اسلام آباد ہائیکورٹ کے باہر میڈیا سے گفتگو کرتے ہوئے کہا کہ درخواست کو پڑھ کر لگا جیسے بچے ڈر رہے ہیں، درخواست دینے والا اتنا سپر انٹیلی جنٹ کون ہے، نیب نے میری ضمانت منسوخی کی درخواست دی ہے، اس درخواست گزار کا چہرہ قوم کو دکھایا جائے، میں نیب میں اپنے اس ہمدرد کو دیکھنا چاہتی ہوں، درخواست دینے والے کو 21 نہیں 22 توپوں کی سلامی دینی چاہیئے۔ میں نے جودرخواست دی اس کاان کے پاس کوئی جواب نہیں۔ 

مریم نواز  نے مزید کہا کہ گرفتاری سے ڈرتی ہوں نہ نیب سے، مجھے گرفتاری سے کوئی فرق نہیں پڑتا۔مجھے ڈرانے والے بھول میں ہیں، سچ کو وقتی طور پر طاقت سے دبایا جا سکتا ہے لیکن سچ سامنے ضرور آتا ہے،  نواز شریف نے کہا تھا کہ اپنا مقدمہ اللہ کی عدالت میں چھوڑ دیا تو سب سے بڑی طاقت اللہ کی ہے۔ ان کاکہنا تھا کہ ایک آئینی وزیراعظم کو جو حقوق حاصل ہیں اس پر کوئی دو رائے نہیں ، عمران خان نواز شریف کے مینڈیٹ پر ڈاکہ ڈال کر مسلط ہے۔ 

انہوں نے کہاکہ ایک شخص جو اس وقت قابض ہے جو آئین کے تحت معاملات چلانے کے بجائے جادو ٹونے سے ملک کو چلا رہا ہے، جن عہدوں کی تقرریوں کا ملک کی سلامتی سے تعلق ہے،  بجائے وزیراعظم کے جنات ملک کے اہم عہدوں کی تقرریاں کرتے ہوں تو پھر ملک اور اداروں کے تماشا بننے پر کوئی اچنبھے  کی بات نہیں،  جادوٹونا ،جنتر منتر اتنا ہی کامیاب ہے تو عوام کی بھلائی کیلئےاستعمال کیوں نہیں  ہوتا؟  اگر وہ طریقہ اتنا ہی کامیاب ہے تو پھر اس سے چینی، آٹا اورتیل سستا کرو، کیا آپ نے قوم کو بیوقوف سمجھ رکھا ہے؟۔

مریم نواز نے کہاکہ یہ وزیراعظم کے اختیارات اور جمہوریت کا مسئلہ نہیں،یہ اپنی ذات اور حکومت کو چند دن اور مہلت دینے کا مسئلہ ہے، پورا ملک اس وقت بند ہے، اداروں اور ملک کا تماشا بن چکا ہے، اس لیے کیونکہ ایک شخص کو برقرار رکھنا ہے  کیونکہ وہ آپ کی اکھاڑ پچھاڑ کے لیے کام آتا ہے۔ 

ان کاکہنا تھا کہ آج ووٹ کو عزت دو یاد آ گئی، ان کو نواز شریف بننے کی کوشش بھی نہیں کرنی چاہیے، نواز شریف جب ووٹ کو عزت دینے کا نعرہ لیکر آیا تھا تو وہ عوامی وزیراعظم تھا،ووٹ کوعزت دو کا نعرہ لگانے کیلئےجیلیں برداشت کرنا پڑتی ہیں۔  مریم نواز نے کہاکہ ووٹ کی حرمت کو پاؤں کے نیچے کچل کر آنا ان کی پہچان ہے،  ایک آئینی وزیراعظم کی عزت سے آپ کا کوئی لینا دینانہیں، شیر کی کھال پہننےسےکوئی شیرنہیں بن جاتا، ان کی جدوجہد جمہوریت کیخلاف سازش سے عبارت ہے۔