کالعدم جماعت کا احتجاج : راولپنڈی اور لاہور کے درمیان ریلوے سروس متاثر

موجودہ حالات کے پیش نظر ریلوے انتظامیہ نے پشاور، راولپنڈی سے لاہور آنے اور جانے والی ٹرینوں کو براستہ جنڈ، بسال، کندیاں، سرگودھا، سانگلہ ہل، شیخوپورہ، لاہور روانہ کیا جارہاہے ۔ 

ترجمان ریلوے کے مطابق لاہور اور راولپنڈی کے درمیان شام 4 بجکر 30 منٹ پر چلنے والی سبک خرام اور شام 6 بجے چلنے والی اسلام آباد ایکسپریس اور رات 12بجکر30 منٹ پر چلنے والی راول ایکسپریس کوبھی دونوں اطراف سے آج کے لیے معطل کیاگیا ہے۔

اسی طرح پشاور سے کوئٹہ جانے والی جعفرایکسپریس کوپشاور اور لاہور کے درمیان آج کے روز معطل کردیا گیا ہے۔ 

ترجمان ریلوے کاکہنا ہے کہ پاکستان ریلوے کے سسٹم پر چلنے والی باقی تمام ٹرینیں اپنے اپنے معمول اور روٹ کے مطابق چل رہی ہیں۔ 

واضح رہے کہ کالعدم جماعت  کا احتجاج  آج ساتویں روز میں داخل ہوگیا اور مظاہرین نے  گزشتہ رات سے کامونکی میں پڑاؤ ڈال رکھا ہے ،  مظاہرین نے مارچ کو آگے بڑھانے کے لیے تیاریاں شروع کردی ہیں، شہراور جی ٹی روڈ میں کاروباری مراکز بند ہیں۔  جی ٹی روڈ سے لنک سڑکوں کی بھی نگرانی جاری ہےاور کسی بھی  نا خوشگوار واقعہ سے نپٹنے کے لئے رینجربھی طلب کر لی گئی ہے۔ 

یہ بھی پڑھیں : مذہبی جماعت کا لانگ مارچ، جی ٹی روڈ بند