مذہبی جماعت کا لانگ مارچ، جی ٹی روڈ  بند

تفصیلات کے مطابق اسلام آباد کی طرف مارچ کرنے والے کالعدم تنظیم (ٹی ایل پی ) کے کارکنوں نے کامونکی جی ٹی روڈ پر پڑاؤ ڈال دیا ہے، مظاہرین نے مارچ کو آگے بڑھانے کے لیے تیاریاں شروع کردی ہیں، شہراور جی ٹی روڈ میں کاروباری مراکز بند ہیں جبکہ  جی ٹی روڈ پر دکانوں اور ریسٹورنٹس  کو بھی بند کروا دیا گیا۔

 جی ٹی روڈ سے لنک سڑکوں کی بھی نگرانی جاری ہےاور کسی بھی  نا خوشگوار واقعہ سے نپٹنے کے لئے رینجربھی طلب کر لی گئی ہے۔ 

دریائے چناب پل کے قریب جی ٹی روڈ پر خندقیں مزید گہری کر دی گئیں   جبکہ وزیرآباد سے سیالکوٹ جانے والی سڑک کی کھدائی کرکے دونوں شہروں کا زمینی رابطہ منقطع کردیا گیا ہے۔وزیرآباد کے علاقہ خانکی بیراج پر بنایا گیا پل بھی بلاک کر دیا گیا۔ 

جی ٹی روڈ اور ملحقہ علاقوں میں سرکاری اور نجی تعلیمی ادارے بھی نہیں کھلے، کامونکی میں انٹر نیٹ سروس بھی بند ہے۔ 

راولپنڈی میں سکیورٹی مزید سخت کردی گئی ہے اور  مری روڈ ٹریفک کے لیے مکمل بند ہے جب کہ راولپنڈی میٹروبس سروس تا حکم ثانی بند ہے۔

واضح رہےکہ حکومت نے کالعدم جماعت  سے عسکریت پسند تنظیم کی طرح نمٹنے کا فیصلہ کیا ہے اور پنجاب بھر میں دو ماہ کے لیے رینجرز بھی تعینات کردی گئی ہے۔

کالعدم تحریک لبیک کے احتجاج میں گزشتہ روز مزید تین پولیس اہلکارشہید ہوگئے جبکہ  احتجاج کے دوران تشدد سے کئی پولیس اہلکار زخمی بھی ہوئے۔احتجاج کے  آغاز سے اب تک 5 پولیس اہلکار شہید ہوچکے ہیں اور مظاہرین کی طرف سے پولیس کی گاڑیاں بھی جلائی گئی ہیں۔

خیال  رہے کہ ٹی ایل پی نے 12 ربیع الاول کو لاہور میں احتجاج کے تازہ ترین دور کا آغاز کیا تھا جو بنیادی طور پر اس کے سربراہ مرحوم بانی خادم رضوی کے بیٹے حافظ سعد حسین رضوی کی رہائی کے لیے پنجاب حکومت پر دباؤ ڈالنے کے لیے تھا۔ ابتدائی طور پر تنظیم نے ملتان اور لاہور میں دھرنے دیے جس کے بعد لاہور کی طرف مارچ کا اعلان کیا گیا۔

سکیورٹی اداروں نے مظاہرین کو اسلام آباد پہنچنے سے روکنے کیلئے اہم سڑکیں بند کردی ہیں  اور مظاہرین  کے کئی روز سے جی ٹی روڈ پر دھرنے کے  باعث ٹرانسپورٹ سروس بھی  معطل ہے۔

اسلام آباد اور راولپنڈی کو ملانے والی مرکزی شاہراہیں سیل کردی گئی ہیں، صدر سے فیض آباد میٹرو سروس معطل ہے، متبادل راستوں پر شدید ٹریفک جام ہوگیا ہے اور شہریوں کو مشکلات کا سامنا ہے۔ دوسری جانب ٹرین سروس بھی محدود کردی گئی ،غذائی اجناس ، ادویات سے لدے ٹرک پھنس گئے  ہیں جس کی وجہ سے ٹرانسپورٹرز بھی شدید پریشان ہیں ۔