حکومت اور کالعدم جماعت میں معاملات طے پا گئے، ذرائع

ذرائع کا کہنا ہے کہ حکومت اور کالعدم جماعت میں معاملات طے پا گئے، حکومتی وفد 11 بج کر 15 منٹ پر پی آئی ڈی میں اہم پریس کانفرنس میں اعلان کرے گا۔

ذرائع کے مطابق  حکومت مذاکرات کامیاب ہونے کا اعلان جلد کرنے لگی ہے،  شاہ محمود قریشی، اسد قیصر ،مفتی منیب اور علی محمد خان معاہدے کے حوالے سے اعلان کرنے جا رہے ہیں,طے شدہ معاملات پر عملدرآمد کی ذمہ داری سیکرٹری داخلہ یوسف نسیم کھوکھر کو دی جائے گی۔

ذرائع کا کہنا ہے کہ  پہلے کالعدم تنظیم کے لوگ جی ٹی روڈ پر دھرنا ختم کر کے واپس جائیں گے،  گرفتار کارکنوں کی رہائی قانونی ضابطے پورے کر کے عمل میں لائی جائے گی،وفاقی حکومت بین الاقوامی ضابطوں کو مدنظر رکھتے ہوئے مرحلہ وار اقدامات کرے گی۔

گزشتہ روز  وزیر اعظم عمران خان نے  کالعدم جماعت کے حوالے سے قوم سے خطاب کرنا تھا جسے ملتوی کردیا گیا تھا ۔ کالعدم تنظیم کے احتجاج کے معاملے پر  علما کے وفد کی وزیر اعظم سےملاقات ہوئی۔ وزیراعظم عمران خان سے ملاقات کے بعد وفاقی وزیر مذہبی امور نورالحق قادری نے پریس کانفرنس میں کہا کہ مظاہرین سے مذاکرات کیلئے علما و مشائخ کی 12 رکنی کمیٹی بنا دی گئی، وزیراعظم نے واضح کیا کہ سنجیدہ مذاکرات کو ہمیشہ خوش آمدید کہا جائے گا۔

قبل ازیں  وفاقی وزیر داخلہ شیخ رشید نے پریس کانفرنس میں بتایا تھا کہ شائد وزیر اعظم کل 30اکتوبر یا پھر پرسوں 31اکتوبر قوم سے خطاب کریں گے ۔ شیخ رشید نے کہا تھا کہ وزیر اعظم کا خطاب ہی کابینہ کا بیانیہ ہوگا۔