بائیڈن نے ٹرمپ کے اقدام پر دنیا سے معافی مانگ لی

غیرملکی خبررساں ادارے کے مطابق گلاسگو میں جاری موسمیاتی تبدیلی کی عالمی کانفرنس سے خطاب کرتے ہوئے امریکی صدر جوبائیڈن نے کہا کہ ٹرمپ انتظامیہ موسمیاتی تبدیلی کے پیرس معاہدے سے دستبردار ہوگئی تھی۔

انہوں نے کہا کہ میرا خیال ہے کہ مجھے معافی نہیں مانگنی چاہیے،  لیکن  گزشتہ انتظامیہ کے پیرس معاہدے سے باہر نکلنے پر میں معافی مانگتا ہوں کیونکہ امریکا پیرس معاہدے سے باہر نکلنے کے باعث بہت  کچھ پیچھے رہ گیا۔

صدر جوبائیڈن کا کہنا تھا کہ میں نے صدارت کاحلف اٹھاتے ہی پیرس معاہدے میں شمولیت کا اعلان کیا تھا، امریکی عوام پانچ سال پہلے موسمیاتی تبدیلی کی حقیقت سےآگاہ نہیں تھے ۔ انہوں نے کہا کہ موسمیاتی تبدیلی کے امریکا میں بھی واضح اثرات نظر آرہے ہیں ۔

 ان کا کہنا تھا کہ  ہمارے  سامنے صرف ایک مختصر سی کھڑکی ہے کہ ہم اپنے عزائم کو بلند کریں اور اس کام کو پورا کرنے کے لیے جو تیزی سےکم  ہو رہے ہیں۔ یہ ایک فیصلہ کن دہائی ہے جس میں ہمارے پاس موقع ہے کہ  اپنے آپ کو ثابت کریں۔

واضح رہے کہ یکم جون سال2017کوامریکی صدر ٹرمپ نے پیرس میں ہونے والے عالمی ماحولیاتی معاہدے سے دستبردار ہونے کا فیصلہ کیا تھا۔  جس کے بعد امریکہ کے یورپی اتحادیوں کے ساتھ اختلافات مزید گہرے  ہوگئے تھے ۔

خیال  رہے کہ 2015ء میں 200 سے زائد ممالک نے پیرس میں مذکورہ معاہدے پر رضامندی ظاہر کی تھی۔ 

واضح رہے کہ عالمی درجہ حرارت میں اضافے اور ماحولیاتی تبدیلیوں کی وجہ سے دنیا شدید موسمیاتی تبدیلیوں کی زد میں ہے ، اس حوالے سے موسمیاتی تبدیلی کے حوالے سے عالمی سطح کی سربراہی کانفرنس گلاسکو میں کل سے شروع ہوئی ہے ، کانفرنس کوپ 26میں 120 ممالک کے وزرائےاعظم اور سربراہان مملکت شریک ہونگے۔