امن کی خواہش کو ہماری کمزوری نہ سمجھا جائے : سربراہ پاک فضائیہ

تفصیلات کے مطابق آپریشن سوئفٹ ریٹارٹ کے 2 سال مکمل ہونے پر ایئرہیڈکوارٹرز اسلام آباد میں ایک تقریب منعقد ہوئی جہاں پاک فضائیہ کے طیاروں نے فلائی پاسٹ کیا جبکہ طلبہ نے ملی نغمے بھی پیش کیے۔ اس موقع پر پاک فضائیہ کے سربراہ ایئرمارشل مجاہد انور خان نے خطاب کرتے ہوئے   کہا کہ 27 فروری نہ صرف پاک فضائیہ کی تاریخ کا اہم ترین دن ہے بلکہ یہ ملک کی تاریخ کے لیے بھی اہم ہے، اس تاریخی دن پاک فضائیہ نے ایک بار پھر اپنی شاندار صلاحیت کو منوایا اور ان حملہ آوروں کو ناکام بنایا جنہوں نے غلط اندازہ لگا کر ہماری خودمختاری کو للکارا تھا۔

انہوں  نے کہا کہ آپریشن سوئفٹ ریٹارٹ کے تحت ہماری افواج نے بہترین دفاع کیا، پاک فضائیہ کے پائلٹس کو پیشہ ورانہ صلاحیتوں پر سلام پیش کرتا ہوں، پاکستان ایک پر امن ملک ہے اور  دنیا نے دیکھا کہ پاکستان نے امن کیلئے بھارتی پائلٹ واپس کیا۔ تاہم میں یہاں یہ واضح کرنا چاہتا ہوں کہ ہماری امن کی کوشش کو کمزوری نہ سمجھا جائے، کسی بھی مہم جوئی کی صورت میں ہمارا جواب فوری، پختہ اور غیرمتزلزل ہوگا۔

 ایئر چیف مارشل مجاہد انور خان کا کہنا تھا کہ ہماری افواج کو ملک کے دفاع کیلئے ہر لمحہ تیار رہنا ہوگا ، وطن عزیز کے دفاع کیلئے ہر لمحہ تیار ہیں،  پاک فضائیہ اپنی تمام صلاحیتوں کو عملی جامہ پہنانے اور مقامی سطح پر کوششوں کے ذریعے جدیدیت کے حصول کے لیے مستقل کوششیں کر رہی ہے۔ انہوں نے کہا کہ اس موقع پر میں یہ اعادہ کرتا ہوں کہ ہم اپنے کشمیری بھائیوں اور حق خود ارادیت کے لیے ان کی جدوجہد کے ساتھ کھڑے ہیں، وقت آگیا ہے کہ وہاں ڈیڑھ سال سے زائد عرصے سے جاری پابندیوں اور لاک ڈاؤن کا خاتمہ ہو۔

واضح رہے کہ27 فروری 2019 تاریخ کا وہ دن ہے جب پاک فضائیہ کے شاہینوں نے دشمن کو منہ توڑ جواب دے کر دنیا کو یہ بتایا تھا کہ مملکت خداداد کے دفاع کے لیے ہم ہمہ وقت تیار ہیں۔ سال 2019 میں 27 فروری کو پاک فضائیہ نے ملک کی فضائی حدود کی خلاف ورزی کرنے والے بھارتی طیاروں کو مار گرایا تھا اور ان کا پائلٹ ابھی نندن بھی گرفتار کرلیا تھا۔