اپوزیشن لیڈر شہباز شریف کا اپوزیشن رہنماؤں کے اعزاز میں عشائیہ

تفصیلات کے مطابق قومی اسمبلی میں اپوزیشن لیڈر شہباز شریف کی جانب سے اپوزیشن رہنماؤں کے اعزاز میں دئیے گئے عشائیہ میں پاکستان پیپلز پارٹی کے چیئر مین بلاول بھٹو زرداری نے پی پی پی اراکین پارلیمان کے ہمراہ شرکت کی ہے۔

بلاول نے اپوزیشن کی تمام سیاسی جماعتوں کے اراکین سے ملاقات کی،عشائیہ میں اپوزیشن اراکین کے درمیان ملکی سیاسی صورت حال پر بات چیت کی گئی۔

بلاول بھٹو زرداری کا کہنا تھا کہ اپوزیشن شہبازشریف کی قیادت میں متحد ہے، پارلیمنٹ کے مشترکہ اجلاس میں پیپلزپارٹی مکمل تعاون کرے گی، ہمارے تمام اراکین مشترکہ اجلاس میں شریک ہوں گے، بے روزگاری اور مہنگائی عوام کا سب سے بڑا مسئلہ ہے، میں آپ کا شکر گزار ہوں آپ وقتاً فوقتاً مشاورت کرتے رہتے ہیں۔

شہباز شریف کا کہنا تھا کہ تمام لیگی اراکین پارلیمنٹ کے مشترکہ اجلاس میں حاضری یقینی بنائیں گے۔

ان کا مزید کہنا تھا کہ حکومت نے 22 کروڑ عوام کی زندگی اجیرن کردی ہے، فیصلہ کیا مہنگائی کے خلاف اور نیب آرڈیننس کے خلاف کمر کس لی ہے، عمران نیازی این آر او لینا چاہتا ہے، متحدہ اپوزیشن پارلیمان میں اور پارلیمان سے باہر بھرپور احتجاج کرے گی، مہنگائی کے خلاف ملک بھر میں ریلیاں نکالی جائیں گی، حکومت کے خلاف ہر فورم پر احتجاج کریں گے۔