عمران خان کو نوجوان اقتدار میں لائے تھے وہی بھگائیں گے:سراج الحق

اسلام آباد میں ریلی کے شرکا سے خطاب کرتے ہوئے سراج الحق کا کہنا تھا کہ خان صاحب نے ملکی اداروں کو تباہ کیا، اسٹیٹ بینک کو آئی ایم ایف کے حوالے کیا۔

ان کا کہنا تھا کہ اس حکومت میں آٹے کی قیمت میں 80 فیصد اور ادویات کی قیمتوں میں 12 بار  اضافہ ہوا ، سعودی عرب سے 4 ارب ڈالر خیرات ملی ہے لیکن پتہ چلا کہ یہ خیرات بھی سود پر ملی ہے ۔

امیر جماعت اسلامی کا کہنا تھا کہ پی ٹی آئی حکومت کو عوام پر مسلط کیا گیا، ظالموں اور لٹیروں کو حکومت سے رخصت کرنےکی ضرورت ہے۔ 

سراج الحق کا کہنا تھا کہ پارلیمنٹ میں 74 سالوں سے نوجوانوں کی نمائندگی نہیں، عمران خان ایک دفتر نہیں چلا سکے، ملک کیا چلائیں گے۔

امیر جماعت اسلامی کا کہنا تھا کہ 2023 میں عوام عمران خان کو آئینہ دکھائیں گے، عمران خان نے 22 کروڑ عوام کو دھوکا دیا، چینی مافیا، گندم مافیا اور پیٹرول مافیا نے اربوں روپے عوام سے بٹورے ۔

سراج الحق کامزید کہنا تھا کہ عوام ہرروز نئی ویڈیو لیکس دیکھتے ہیں۔