چین تائیوان کشیدگی ، امریکہ نےخبردار کردیا

تفصیلات کے مطابق امریکی وزیر خارجہ انٹونی بلنکن نے ایک  کانفرنس میں کہا ہے کہ چینی رہنماؤں کو تائیوان کے خلاف اپنے اقدامات کے بارے میں احتیاط سے سوچنا چاہئے، چین کو  تائیوان کے خلاف کوئی بھی  قدم اٹھانے کے سنگین نتائج کا سامنا کرنا پڑے گا۔ 

ایک انٹرویو میں، بلنکن نے صدر جو بائیڈن کی انتظامیہ کو درپیش خارجہ پالیسی کے متعدد چیلنجوں کا ذکر کیا، جن میں 2015 کے ایران جوہری معاہدے کو ٹھیک کرنے کی ناکام کوششیں، یوکرین کے قریب روس کی فوجی تشکیل، اور ایتھوپیا میں بڑھتے ہوئے تنازعات  شامل ہیں۔

واضح رہے کہ تائیوان اور چین کے درمیان فوجی کشیدگی 40 برسوں کی بدترین سطح پر پہنچ چکی ہے۔تائیوان کے وزیر دفاع کا رواں ماہ ہی کہنا تھا کہ چین تائیوان پر 2025 تک ’مکمل پیمانے پر‘ حملہ کرنے کی صلاحیت رکھتا ہے ۔ رواں ماہ کے اوائل میں چین کے 38 جنگی طیاروں نے تائیوان کی سرحد پر پروازیں بھی کی تھیں۔

اس علاقے کو تائیون کی فضائی حدود نہیں قرار دیا جاتا بلکہ یہ ایسا دفاعی زون ہے جو ایک بڑے علاقے پر محیط ہے جس میں چین کے دفاعی زون کا بھی علاقہ شامل ہے۔ چین کی حکومت کئی بار یہ اعلان کر چکی ہے وہ تائیوان کو اپنے ملک میں شامل کرے گی۔