سعودی حکومت کا اقامے کے حوالے سے اہم اقدام

ریاض: سعودی محکمہ پاسپورٹ کا کہنا ہے کہ مملکت میں اقامہ کارڈز پر ایکسپائری کی تاریخ ختم کی جاچکی ہے اب اقامہ دوبارہ پرنٹ نہیں ہوتا۔

عرب میڈیا کی رپورٹ کے مطابق جوازات نے ایک سوال پر وضاحت کی کہ سعودی عرب میں تارکین کو جاری کیے جانے والے رہائشی پرمٹ کو اقامہ کہا جاتا ہے، اقامہ کارڈ پہلے 5 سال کے لیے جاری کیا جاتا تھا، تاہم دو برس قبل نئے اقامہ کارڈز پرایکسپائری کی تاریخ ختم کردی گئی ہے۔

محکمہ نے بتایا کہ اب اقامے کو دوبارہ پرنٹ نہیں کرنا پڑتا تاہم کارڈ کی تجدید سالانہ بنیادوں پرسسٹم کے ذریعے مقررہ فیس ادا کرنے کے بعد کی جاتی ہے۔

اس سے قبل اقامے کی معیاد ختم ہونے پر کارڈ بھی دوبارہ تیار کیا جاتا تھا لیکن اب ایکسپائری تاریخ ختم کردی گئی ہے بس مقررہ مدت ختم ہونے پر اسی کارڈ کی ہی معیاد بڑھا دی جاتی ہے۔

سعودی قوانین کے تحت مملکت میں ورک ویزے پر رہنے والے کارکن اپنے اقامے کے معاملات کے لیے خود جوازات کے دفتر سے رجوع نہیں کر سکتے بلکہ کیفل اس طرح کے معاملات کو دیکھتا ہے۔

اسپانسر ہی جوازات کے دفتر سے رجوع کر کے کارکن کے اقامہ یا دیگر معاملات کو حل کرنے کی صلاحیت رکھتا ہے۔

البتہ غیر ملکی کارکنوں کو یہ اختیار حاصل ہے کہ وہ اپنی زیر کفالت اہل خانہ کے اقامہ کی تجدید یا دیگر معاملات کے حوالے سے جوازات کے ادارے سے رجوع کر سکتے ہیں۔