عامر لیاقت کی بجائے کوئی سنجیدہ سوال کریں: فیصل واوڈا صحافی پر برہم

تفصیلات کے مطابق سینیٹ انتخابات کیلئے 37 نشستوں پر پولنگ کا آغاز ہوگیا۔ پولنگ بغیر کسی وقفے کے شام 5 بجے تک جاری رہے گی۔ قومی اور صوبائی اسمبلیوں کے باہر سکیورٹی کے سخت انتظامات کئے گئے ہیں۔قومی اسمبلی میں سینیٹ کا پہلا ووٹ پی ٹی آئی کے فیصل واوڈا نے کاسٹ کیا۔ 

ووٹ کاسٹ کرنے کے بعد میڈیا سے غیر رسمی گفتگو میں فیصل واوڈا نے کہا کہ  اللہ کی مہربانی سے گیلانی کو زبردست شکست ہوگی۔پیپلز پارٹی شرمندگی مٹانے کیلئے کسی اور سینیٹر کو ہٹا کر گیلانی کو سینیٹر بنائیں گے۔

اس دوران صحافی نےعامر لیاقت سے متعلق سوال کیا جس پر فیصل واوڈا سیخ پا ہوگئےاور کہا کہ  عامر لیاقت کی بجائے کوئی سنجیدہ سوال کریں، صحافی نے سوال کیا کہ کیا آپ عامر لیاقت کو سنجیدہ نہیں سمجھتے؟ جس پر فیصل واوڈ نے کہا کہ نہیں کوئی سنجیدہ سوال ہوتو جواب دوںگا۔ 

واضح رہے کہ وفاق اور صوبوں میں جنرل نشستوں پر 37 امیدوار آمنے سامنے ہیں، خواتین 18، ٹیکنو کریٹ 13 اور اقلیتی نشستوں پر 8 امیدوار مدمقابل ہیں۔ سلام آباد کی جنرل نشست پر پی ٹی آئی کے ڈاکٹر عبدالحفیظ شیخ اور پاکستان ڈیموکریٹک موومنٹ کے یوسف رضا گیلانی کے درمیان کانٹے کا مقابلہ متوقع ہے۔جبکہ آئین کے مطابق سینیٹ انتخابات خفیہ بیلٹ کے ذریعے ہوں گے۔