بھارتی چیف آف ڈیفنس اسٹاف جنرل بپن راوت کا ہیلی کاپٹر گرکرتباہ

بھارتی خبرایجنسی کے مطابق چیف آف ڈیفنس اسٹاف جنرل بپن راوت کا ملٹری ہیلی کاپٹر ریاست تامل ناڈو میں گر کر تباہ ہوا ۔ بھارتی خبرایجنسی کے مطابق ہیلی کاپٹر میں جنرل بپن راوت کا عملہ اور گھر کے کچھ افراد بھی سوار تھے ۔ ہیلی کاپٹر حادثے میں جنرل بپن راوت کی اہلیہ سمیت11 افراد ہلاک ہوگئے ہیں ، 3 زخمی ہیں ۔  جنرل بپن کی حالت تشویش ناک بتائی جارہی ہے ، ابتدائی رپورٹس کے مطابق حادثہ دھند کے باعث پیش آیا ہے ۔

بھارتی میڈیا کے مطابق  فوجی ہیلی کاپٹرنے کوئمبتور میں بھارتی  فوج کےفضائی اڈے سے ویلنگٹن کیلئے اڑان بھری تھی ۔ ابتدائی اطلاعات کے مطابق  فوجی  ہیلی کاپٹر میں اب تک تین افراد کو بچا لیا گیا ہے ، ریسکیو کیے جانےوالے کچھ  افراد  کو شدید چوٹیں آئی ہیں اور انہیں ضلع نیلگیر کے ویلنگٹن کنٹونمنٹ کے ہسپتال لے جایا گیا ہے۔

بھارتی فضائیہ کی جانب سے بھی اس حوالے سے سوشل میڈیا پر تصدیق کی گئی ہے کہ چیف آف ڈیفنس اسٹاف جنرل بپن راوت کا ایم آئی 17وی فائیو ہیلی کاپٹر گر کر تباہ ہو گیا ہے۔

An IAF Mi-17V5 helicopter, with CDS Gen Bipin Rawat on board, met with an accident today near Coonoor, Tamil Nadu.
An Inquiry has been ordered to ascertain the cause of the accident.

— Indian Air Force (@IAF_MCC) December 8, 2021

دوسری جانب بھارتی میڈیا رپورٹس میں ہیلی کاپٹر حادثے   کے حوالے سے اس بات کی تصدیق نہیں ہو سکی ہے کہ ہلاک ہونے والوں میں کون کون شامل ہے۔ 

بھارتی خبر ایجنسی کے مطابق سرچ اور ریسکیوآپریشن جاری ہے ،  ہیلی کاپٹر حادثے کی وجہ جاننے کیلئےتحقیقات کا حکم دے دیاگیا ہے۔ بھارتی میڈیا کے مطابق بھارتی وزیراعظم نریندرمودی اور بھارتی وزیردفاع راجناتھ سنگھ کو ہیلی کاپٹر حادثے پربریفنگ دے دی گئی ، بھارتی وزیردفاع راجناتھ سنگھ پارلیمنٹ کو ہیلی کاپٹر حادثے پر بریفنگ دیں گے۔ 

خیال رہے کہ جنرل بپن راوت بھارت کے پہلےچیف آف ڈیفنس اسٹاف ہیں،جنرل بپن راوت 3فروری 2015کو پیش آنے والےہیلی کاپٹرحادثے میں  بچ چکے ہیں۔