قومی بچت اسکیموں پر شرح منافع میں اضافہ

وزارت خزانہ کی جانب سے قومی بچت اسکیموں کی شرح منافع میں اضافے کا نوٹیفکیشن جاری کر دیا گیا جس کا اطلاق 10 دسمبر سے ہوگا۔

نوٹیفکیشن کے مطابق  پینشنرز اکاؤنٹ پر شرحِ منافع 11.04 سے بڑھا کر 12.96 فیصد،  بہبود سیونگز اکاؤنٹ پر 11.04 سے بڑھا کر 12.96 فیصد  اور ریگولر انکم اکاؤنٹ پر منافع 8.76 سے بڑھا کر 10.80 فیصد کردیا گیا ہے۔

ریٹائرڈ، سینئر سٹیزن اور بیوہ خواتین کو قومی بچت اسکیم کے تحت ایک لاکھ روپے پر سالانہ بارہ ہزار نو سو ساٹھ روپے منافع ملے گا۔

اس کے علاوہ سیونگز اکاؤنٹ پر شرح منافع  5.50 فیصد سے بڑھا کر 7.25 فیصد ، اسپیشل سیونگز اکاؤنٹس پر 8.20 فیصد سے 10.60 فیصد ، ڈیفنس سیونگ اور سرٹیفکیٹ پر منافع 9.37 فیصد سے بڑھا کر 10.98 فیصد کردیا گیا ہے۔

یاد رہے رواں سال جون میں قومی بچت اسکیموں کےشرح منافع میں تبدیلی کی گئی تھی ، نوٹیفکیشن میں بتایا گیا تھا کہ 10سالہ ڈیفنس سیونگزسرٹیفکیٹ پرشرح منافع 9.35 فیصد اور ریگولرانکم سیونگزسرٹیفکیٹ پرشرح منافع 8.76 فیصد مقرر کردی گئی  ۔