مہنگائی صرف پاکستان کا نہیں بلکہ پوری دنیا کامسئلہ ہے : وزیراعظم 

تفصیلات کے مطابق میانوالی میں منصوبوں کا افتتاح اور یونیورسٹی کا سنگ بنیاد رکھنے کے بعد تقریب سے خطاب میں وزیر اعظم عمران خان کا کہنا تھا کہ  بلکسر سے میانوالی اور میانوالی سے مظفرگڑھ کی سڑک اب شروع ہو گی اور ڈیڑھ سال میں مکمل ہو جائے گی ۔ کبھی ایسا نہیں ہوا کہ کمزورعلاقوں کو ساتھ لے کرچلا جائے، ہمارے پانچ سال مکمل ہوں گے تو پسماندہ علاقوں میں سب سے زیادہ ترقی نظرآئےگی ۔

ان کا کہنا تھا کہ کورونا اور لاک ڈاؤن کے باعث تجارت کم ہوئی اس لیےچیزیں مہنگی ہوئیں۔ مشکل وقت ہے لیکن  تین سے چاہ ماہ میں مہنگائی کم ہوجائےگی ۔1982 کے بعد امریکا کی تاریخ میں سب سے زیادہ مہنگائی ہوئی ہے۔

وزیراعظم نے کہاکہ  پچاس ہزار سے کم تنخواہ پانے والوں کو آٹے ، گھی اور دالوں پر تیس فیصد سبسڈی دیں گے۔

وزیراعظم نے کہاکہ لیفٹ ہو یا رائٹ ہم سب سےبات چیت کرنےکوتیارہیں۔ صرف  ان سےبات نہیں کریں گے جو پاکستان کا پیسہ چوری کر کے ملک سے باہرلے گئے۔ ان سے کبھی این آر اودیں گے نہ مفاہمت کریں گے۔

انہوں نے مزید کہا کہ پاکستان کی تاریخ میں سب سے زیادہ پیسہ ہم نوجوانوں کی تعلیم پر خرچ کر رہے ہیں، حکومت 62 لاکھ لوگوں کو اسکالر شپ دے گی۔

وزیراعظم عمران خان نے  کہا کہ  ہرمعاشرہ چوروں کو جیلوں میں ڈالتا ہے ان سے ڈیل نہیں کرتا، رول آف لاء اور انسانیت کا نظام نہ ہوتو ترقی نہیں ہوگی ، آزادی کے بعد بھی ہم آزاد فیصلےنہیں کر سکتےتھے ۔ جلد پاکستان اپنے پاؤں پر کھڑاہوگا  اور اپنے فیصلےخود کرے گا۔