لیگی رہنما بلال یاسین پر قاتلانہ حملہ کی تحقیقات میں اہم پیش رفت

تفصیلات کے مطابق پاکستان مسلم لیگ ن (پی ایم ایل این) کے رہنما بلال یاسین پر قاتلانہ حملہ کی تحقیقات میں پیش رفت ہوئی ہے، ملزمان نے جس پسٹل سے فائرنگ کی وہ فرار ہوتے ہوئے گر پڑا تھا، ملزمان کے فرار کے دوارن کی سی سی ٹی وی فوٹیج میں بھی پسٹل گرتے دیکھا جاسکتا ہے۔

پولیس کا کہنا ہے کہ  پسٹل کس نام پر رجسٹرڈ ہے تحقیقات کی جا رہی ہیں۔

خیال رہے کہ مسلم لیگ ن کے رکن پنجاب اسمبلی بلال یاسین نے قاتلانہ حملے کے بعد پہلا بیان دیتے ہوئے کہا کہ وہ معمول کے مطابق نماز جمعہ کی ادائیگی کے بعد اپنے حلقے میں گھوم رہے تھے۔  مجھے پتہ ہی نہیں چلا کہ کب فائرنگ کی گئی، گولیاں لگنے سے گر گیا تھا اور یقین ہی نہیں آیا کہ مجھے مار رہے ہیں۔

رہنما مسلم لیگ ن نے کہا کہ کسی سے دشمنی نہیں ہمیشہ اکیلا ہی رہتا ہوں۔ مجھ پر کس نے حملہ کیا ابھی تک معلوم نہیں۔ بہر حال میرا آپریشن ہوگیا اور گولی نکال دی گئی ہے۔انہوں نے کہا کہ اکیلا گھومنے والا بندہ ہوں میرے خلاف کوئی سازش ہو گی۔ ن لیگی قیادت کا شکریہ ادا کرتا ہوں۔

واضح رہے کہ بلال یاسین کو میؤ اسپتال میں سرجری کے بعد سرجیکل ٹاور کے آئی سی یو وارڈ میں منتقل کر دیا گیا ہے۔ بلال یاسین کو پیٹ میں لگنے والی گولی نے کسی حصہ کو متاثر نہیں کیا۔