‘ملک کی تاریخ میں ”نیا پاکستان قومی صحت کارڈ“ جیسے پراجیکٹ کی مثال ملنا مشکل ہے’

اپنے جاری کردہ بیان میں وزیراعلیٰ پنجاب سردار عثمان بزدار کا کہنا تھا کہ عام آدمی کی فلاح و بہبود کو یقینی کے لئے تعلیم اور صحت کی سہولتوں کی منصفانہ فراہمی پاکستان تحریک انصاف کے منشور میں اولین ہے۔

عثمان بزدار نے کہا کہ اللہ تعالیٰ نے پاکستان تحریک انصاف کی حکومت کو معاشرے کے محروم طبقات کی خدمت کا موقع دیا ہے، وزیراعظم عمران خان کی قیادت میں عوام سے کیے گئے وعدوں کی تکمیل کی طرف پیش رفت کا سلسلہ جاری ہے-

عثمان بزدار نے کہا کہ مفت علاج معالجے کی سہولت کا عہد پوراکررہے ہیں، حکومت پنجاب یونیورسل ہیلتھ کیئر پروگرام کیلئے 400ارب روپے فراہم کرے گی۔

عثمان بزدار کا کہنا تھا کہ نیا پاکستان صحت کارڈ کے اجراء سے نہ صرف سرکاری ہسپتالوں پر دباؤ کم ہوگا بلکہ پرائیویٹ ہیلتھ سیکٹر کی گروتھ بھی یقینی ہے۔

عثمان بزدار نے کہا کہ یونیورسل ہیلتھ کیئر پروگرام کا ڈیرہ غازی خان، ساہیوال او رلاہور ڈویژن میں آغاز ہوچکا ہے جبکہ 20جنوری کو راولپنڈی ڈویژن،9فروری کو فیصل آباد ڈویژن اور 22فروری کو ملتان ڈویژن میں نیا پا کستان قومی صحت کارڈ کا اجراء کیا جائے گا۔

انہوں نے کہا کہ ”نیا پاکستان قومی صحت کارڈ“ بہت بڑا پراجیکٹ ہے،  عوام کی سہولت اوررسائی کیلئے یونیورسل ہیلتھ کیئر پروگرام کے تحت بیڈز کی تعداد10ہزار سے بڑھا کر30ہزار اورپینل پر موجودسرکاری اورنجی ہسپتالوں کی تعداد43 سے بڑھا کر150کردی گئی ہے۔

عثمان بزدار کا کہنا تھا کہ  ”نیا پاکستان قومی صحت کارڈ“ کے ذریعے کینسرسمیت مہلک بیماریوں کا علاج ہوسکے گا، امراض قلب، ہیپاٹائٹس، امراض جگر، ٹی بی، ایڈز، ایمرجنسی، فریکچر کی صورت میں صوبہ بھر کے معیاری نجی ہسپتالوں سے مفت علاج کرایا جاسکے گا۔

عثمان بزدار نے کہا کہ مارچ تک 3کروڑ خاندان اور ساڑھے گیارہ کروڑ افراد کو علاج معالجے کی مفت سہولتیں میسر ہوں گی۔

انہوں نے مزید کہا کہ صحت انصاف کارڈ ہولڈر اوراس کی فیملی کیلئے سالانہ 10لاکھ روپے تک مفت علاج کی سہولت میسر ہے۔