’رواں سال مؤثر حکومتی اقدامات کی بدولت مہنگائی میں نمایاں کمی دیکھنے کو ملے گی‘ 

وزیرمملکت اطلاعات و نشریات فرخ حبیب  نے تقریب سے خطاب کرتے ہوئے کہا کہ  وزیراعظم عمران خان نے ملکی تاریخ میں پہلی دفعہ ہیلتھ انشورنش سکیم متعارف کرائی ،  پنجاب میں لاہورڈویژن سے ہیلتھ کارڈز کی فراہمی کا آغاز کردیا گیا ہے، 9 فروری سے فیصل آباد کے شہریوں کو بھی  ہیلتھ کارڈ فراہم کردیئے جائینگے، ہیلتھ کارڈ سے 10 لاکھ روپے تک مفت علاج کرایاجاسکتا ہے۔

فرخ حبیب نے کہا کہ  موجودہ حکومت  گھروں کی تعمیر کیلئے آسان شرائط پر قرض فراہم کررہی ہے، نوجوانوں کو کاروبار کیلئے 5 لاکھ روپے تک  بلاسود قرضے دیئے جارہے ہیں، پی ٹی آئی حکومت نے 120 ارب روپے کا احساس راشن پروگرام متعارف کرایا،  احساس راشن پروگرام کے تحت اشیاء ضروریہ رعایتی نرخوں پر دستیاب ہونگی۔

وزیر مملکت اطلاعات و نشریات کا کہنا ہے کہ  موجودہ حکومت داسو اور بھاشا سمیت ملک میں 10  نئے ڈیم تعمیر کررہی ہے، نئے ڈیموں کی تعمیر سے سسٹم میں 10 ہزار میگا واٹ سستی بجلی کا اضافہ ہوگا،  چاہتے ہیں کہ پورے ملک میں تعمیر وترقی کا جال بچھے ،  پنجاب حکومت صوبے میں ترقیاتی کاموں پر 740 ارب روپے خرچ کررہی ہے۔انہوں نے مزید کہا کہ  وزیراعظم عمران خان ذاتی نہیں بلکہ ملک اور قوم کی ترقی کیلئے کوشاں ہیں، عالمی سطح پر اشیاء کی قیمتیں بڑھنے سےدیگرملکوں کی طرح پاکستان بھی متاثر ہوا، رواں سال  مؤثر حکومتی اقدامات کی بدولت مہنگائی میں نمایاں کمی دیکھنے کو ملے گی۔