بلوچستان  شدید  بارشیں : گزشتہ 96 گھنٹوں سے پاکستان آرمی، نیوی  کا  ریسکیو ،ریلیف  آپریشن   جاری

پاک فوج کے شعبہ تعلقات عامہ (آئی ایس پی آر ) کی جانب سے جاری کردہ بیان کے مطا بق  بلوچستان کی ساحلی پٹی شدید بارشوں کی زد میں آنے کے بعد گزشتہ 96 گھنٹوں سے پاکستان آرمی، نیوی اور ایف سی کے دستے ضلع گوادر میں ریسکیو اور ریلیف کی سرگرمیوں میں مصروف ہیں،  کولنچ، سردشت اور سن اسٹار وادیوں کے الگ تھلگ دیہاتوں میں خصوصی امدادی سرگرمیاں شروع کی جا رہی ہیں،  گوادر اولڈ ٹاؤن بھی پانی نکالنے کے آپریشن کا مرکز رہا۔

 آئی ایس پی آر کے مطابق   آرمی، ایف سی، پاکستان کوسٹ گارڈز نے طبی کیمپ قائم کیے ہیں اور سیلاب متاثرین میں راشن تقسیم کیا ہے،پی ڈی ایم اے  نے دور دراز علاقوں میں آرمی ایوی ایشن کے ہیلی کاپٹروں کے ذریعے خیمے، کمبل اور راشن فراہم کیا ہے۔

ترجمان پاک فوج کے مطابق  پھنسے ہوئے خاندانوں تک پہنچنے اور دور دراز کے علاقوں تک امداد پہنچانے کے لیے نقصان کا تخمینہ بھی جاری ہے،  پسنی کی آبادی کی مدد کے لیے راشن / کپڑوں سے لدی پی اے ایف سی 130 طیارہ بھی روانہ کیا گیا ہے۔