مری : گاڑیوں میں پھنسے 19 افراد جاں بحق ہو گئے: شیخ رشید

تفصیلات کے مطابق  وفاقی وزیرِ داخلہ شیخ رشید احمد نے مری کی صورتِ حال کے حوالے سے جاری ایک بیان میں کہا ہے کہ 15 سے بیس سال میں پہلی دفعہ اتنی بڑی تعداد میں سیاح مری میں گئے اسی  وجہ سے ایک بہت بڑا بحران پیدا ہوا ۔ اب تک گاڑیوں میں ٹٹھر کر 16 سے 19 لوگوں کی اموات ہو چکی ہیں  تاہم مزید ہلاکتوں کا خدشہ نہیں ہے ۔ 

انہوں نے کہا ہے کہ پچھلے 12 گھنٹوں میں مری کے بند ہونے والے راستے کھولنے میں کامیاب نہیں ہو سکے ، اس وقت مری میں کمشنر ،ڈی سی ،سی پی او اور تمام ٹیمیں کام کر رہی ہیں، پاک فوج اور رینجرز کو مدد کے لئے طلب کیا گیا ہے، پاک فوج کی 5 پلاٹونز کو طلب کیا گیا ہے ۔ چار گاڑیوں پر برف گری جس کے اندر موجود لوگوں کی ہلاکت ہوئی مگر حالات پر پوری نظر ہے۔ 

وزیرِ داخلہ  نے کہا کہ  مری جانے والے تمام راستے بند کر دیے ہیں، سیاحوں کی بہت بڑی تعداد اب بھی مری میں موجود ہے ۔ پہلےگاڑیاں اور اب پیدل جانے والوں کو بھی روک دیا گیا ہے، صرف کپڑے اور کھانا لیجانے والی گاڑیوں کو داخلے کی اجازت ہے۔ انہوں نے اپیل کی ہے کہ مری کے آس پاس کے علاقوں میں رہنے والے لوگ سیاحوں کو خوراک اور کمبل فراہم کریں۔ 

ان کا کہنا تھا کہ دو چار گھنٹوں میں گاڑیوں کا رش کم کرنے میں کامیاب ہو جائیں گے، شام 5 سے 6 بجے تک حالات ٹھیک ہو جائیں گے۔ 

دوسری جانب نیشنل ہائی ویز اینڈ موٹروے پولیس نے ہدایات جاری کرتے ہوئے کہا ہے  کہ برائے مہربانی برفباری کے دوران مری اور گلیات کی طرف غیر ضروری سفر نہ کریں، سیاحوں کی کثیر تعداد میں آمد اور شدید برفباری کی وجہ سے مری ہر قسم کی ٹریفک کے لئے بند کردیا گیا ہے۔ 

 نیشنل ہائی ویز اینڈ موٹروے پولیس اور این ایچ اے کی انتظامیہ مری ایکسپریس وے سے برف کو ہٹانے میں مصروف ہیں، موٹروے پولیس  کے مطابق ڈرائیور حضرات سے گزارش ہے کہ تمام ٹریفک اہلکاروں سے تعاون کریں، عوام سے اپیل ہے کہ سفر سے پہلے 130 موٹروے پولیس ہیلپ لائن پر رابطہ کریں۔