آرمی ریلیف اینڈ ریسکیو آپریشن رات سے ہی شروع ہو گیا تھا:میجر جنرل واجد عزیز

مری ڈویژن کے کمانڈنگ آفیسر میجر جنرل واجد عزیز کا کہنا ہے کہ ملٹری پولیس کے اہلکار سول ایڈمینسٹریشن کے ساتھ مل کر ٹریفک کو دیکھ رہے تھے۔

انہوں نے کہا ہےکہ رات کو آرمی چیف نے کہا کہ ہدایات کا انتظار کئے بغیر مکمل تعاون کریں ، کوشش یہ ہو کہ تمام لوگوں کو امداد پہنچائی جائے ، کسی سیاح کو بھی پریشانی کا سامنا نہ کرنا پڑے۔

میجر جنرل واجد عزیز نے کہا ہے کہ رات کے وقت پاک فوج کے دو کیمپ قائم کر دیئے گئے تھے ، ایک کیمپ کلڈنا میں آرمی اسکول آف لاجسٹک میں قائم کیا گیا ، دوسرا کیمپ سنی بینک میں قائم کیا گیا۔

مری ڈویژن کے کمانڈنگ آفیسر نے کہا ہے کہ آرمی اسکول آف لاجسٹک میں 60 خاندانوں کو رکھا گیا ، سنی بینک میں قائم کیمپ میں 50 خاندانوں کو رکھا گیا۔

انہوں نے کہا کہ ایف ڈبلیو او راولپنڈی کی مشینری نے ایکسپریس ہائی وے کو صاف کیا ، دوپہر تین بجے تک ایکسپریس وے کھل چکی تھی ، جب آخری سیاح کو محفوظ مقام پر نہیں پہنچاتے ریسکیو اور ریلیف آپریشن جاری رہے گا۔