بی جے پی نے نفرت کی فیکٹریاں قائم کر رکھی ہیں: راہول گاندھی

بھارت میں کانگریس کے رہنما راہول گاندھی نے سماجی رابطے کی ویب سائٹ ٹوئٹر پر ہندی میں لکھا کہ ایک مخصوص مذہب کی خواتین کو نشانہ بنانے والے”بلی بائی“ ایپ کیس کے ملزمان کی عمر دیکھتے ہوئے پورا ملک حیران ہے کہ اتنی نفرت کہاں سے آرہی ہے۔

انہوں نے کہا ہے کہ بلی بائی ایپ کیس کے ملزم کی کم عمری کو دیکھ کر پورا ملک پوچھ رہا ہے کہ اتنی نفرت کہاں سے آتی ہے۔

راہول گاندھی نے کہا ہےکہ دراصل بی جے پی نے نفرت کی کئی فیکٹریاں قائم کر رکھی ہیں اور ٹیک فوگ ان میں سے ایک ہے۔

انہوں نے ایک رپورٹ کو ٹیگ کیا جس میں کہا گیا تھا کہ ٹیک فوگ بی جے پی کی معاون ایپ ہے جس نے سائبر آرمی کو نفرت پھیلانے اور سوشل میڈیا پرٹرینڈز کے ساتھ چھیڑ چھاڑ کرنے کی طاقت دی ہے۔

کانگریس رہنما نے کہا کہ کانگریس پہلے ہی اس ایپ کے حوالے سے حکومت سے جواب طلب کر چکی ہے اور بھارتی سپریم کورٹ سے مداخلت کا مطالبہ کرچکی ہے۔ ’بلّی بائی‘ کیس میں سینکڑوں مسلم خواتین کی تصاویر کو ’نیلامی‘ کے لیے ’بلّی بائی‘ نامی ایپ پر اپ لوڈ کیا گیا تھا۔