کورونا ختم نہیں ہوا،شہری ویکسین لگوائیں اورماسک پہنیں : اسدعمر کی اپیل 

تفصیلات کے مطابق وفاقی وزیر منصوبہ بندی و سربراہ این سی او سی ( نیشنل کمانڈ اینڈ آپریشن سنٹر ) اسد عمر نے اسلام آباد میں ایک  تقریب سے خطاب کرتے ہوئے کہا کہ  این سی او سی نے وہ کام کر دکھایا جس کا لوگ سوچ نہیں سکتے تھے، مجھے فخر ہے این سی او سی کے ساتھ کام کا موقع ملا۔

اسد عمر نے این سی اوسی کوخراج تحسین پیش کرتے ہوئے کہا کہ این سی او سی میں کام کرنیوالی ٹیم زبردست ہے، این سی اوسی کی ساری ٹیم بہترین کام کر رہی ہے۔ 

ان کا کہنا تھا کہ  کورونا سے بچاؤ کے لیے پوری قوم نے مل کر کام کیا ہے ، عوام کورونا سے بچاؤ کیلئے ویکسی نیشن ضرور کروائیں اور  30 سال سے زائد عمرکے  افراد بوسٹر ڈوز لازمی لگوائیں۔

واضح رہے کہ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  پاکستان  میں گزشتہ 24 گھنٹوں کے دوران 3 مریض انتقال کر گئے جس کے بعد اموات کی مجموعی تعداد 28ہزار 972ہوگئی ہے ۔ملک میں کورونا کیسز کی مجموعی تعداد 13 لاکھ 5ہزار 707 ہوگئی ہے ۔  

 ملک میں   گزشتہ 24 گھنٹوں کے دوران کورونا کے مثبت کیسز کی  شرح3.66 فیصد رہی ۔ 

این سی اوسی  کے مطابق ملک بھر میں چوبیس گھنٹے کے دوران 45 ہزار002 ٹیسٹ کئےگئے ہیں ۔ پاکستان میں کوروناکے617مریضوں کی حالت تشویشناک ہے ۔