اسلام آباد  کے بلدیاتی الیکشن الیکٹرانک ووٹنگ مشین پر ہی ہونگے : شبلی فراز

تفصیلات کے مطابق وفاقی وزیر سائنس اینڈ ٹیکنالوجی شبلی فراز  نے اسلام آباد میں نیوز کانفرنس کرتے ہوئے کہاہے کہ الیکٹرانک ووٹنگ مشین پر قانون سازی ہوچکی ، ای وی ایم کے معاملات اگلے مرحلے میں داخل ہوچکے ہیں اور  اب عملدرآمد کی طرف جا رہے ہیں۔ 

وفاقی وزیر سائنس اینڈ ٹیکنالوجی  نے کہا کہ ای وی ایم سے متعلق چیف الیکشن کمشنر سے ملاقاتیں ہوئی ہیں، الیکشن کمیشن نے اپنی ضروریات اور آمادگی سے آگاہ کیا ہے ، وزارت سائنس و ٹیکنالوجی الیکشن کمیشن کیساتھ مکمل تعاون کر رہی ہے ، اگلے ہفتے الیکشن کمیشن کو ٹیسٹ اور ٹریننگ کی سہولت دیں گے۔ 

انہوں نے کہا کہ کے پی بلدیاتی انتخابات میں نتائج تاخیر سے آئے، کچھ جگہوں پر ضائع ہونیوالے ووٹوں کی تعداد جیت کے مارجن سے کم تھی ۔  ای وی ایم کے ذریعے الیکشن میں ووٹ ضائع نہیں ہوگا، ای وی ایم سے الیکشن شفاف اور غیر متنازعہ ہوں گے۔

شبلی فرازنے مزید کہا  کہ پولنگ ختم ہونے کیساتھ ہی نتائج مل جائیں گے، الیکشن کمیشن کسی بھی متعلقہ ادارے سے مدد مانگ سکتا ہے، الیکشن کمیشن کیلئے مالی و انتظامی تعاون یقینی بنائیں گے۔ 

انہوں نے مری سانحے میں جاں بحق ہونیوالوں سے اظہار تعزیت بھی کیا ۔