شاہ زیب قتل کیس کا سزا یافتہ مجرم شاہ رخ جتوئی کی سینٹرل جیل سے نجی اسپتال منتقلی کا انکشاف

ذرائع کا کہنا ہے کہ   شاہ زیب قتل کیس کے سزا یافتہ مجرم شاہ رخ جتوئی کی سینٹرل جیل سے نجی اسپتال منتقلی کا انکشاف ہوا ہے،  شاہ رخ جتوئی کی خاموشی سے نجی اسپتال منتقلی پر محکمہ صحت لاعلم ہے۔

ذرائع محکمہ صحت کا کہنا ہے کہ  شاہ رخ جتوئی کی نجی اسپتال منتقلی کے لیے محکمہ صحت سے کوئی رابطہ نہیں کیا گیا،  شاہ رخ جتوئی کو میڈیکل بورڈ کے بغیر ہی نجی اسپتال منتقل کیا گیا ہے،  محکمہ صحت کو جیل یا محکمہ داخلہ کی جانب سے کوئی خط نہیں ملا۔

ذرائع محکمہ صحت کے مطابق قیدی کی زندگی خطرے میں ہو تو اسے سرکاری یا نجی اسپتال منتقل کیا جاتا ہے، نجی اسپتال کے لیے محکمہ داخلہ، محکمہ صحت سے رجوع کرتا ہے،  محکمہ داخلہ قیدی کے لیے میڈیکل بورڈ بنانے کی درخواست کرتا ہے، میڈیکل بورڈ ہی کسی قیدی کو نجی اسپتال منتقل کرنے کی سفارش کرسکتا ہے، شاہ رخ جتوئی کے معاملے پر ایسا کچھ نہیں کیا گیا ۔

ذرائع محکمہ صحت کا کہنا ہے کہ گذری میں واقع نجی اسپتال نیب اور اینٹی کرپشن کے قیدیوں کے لیے سہولت گاہ ہے،  نجی اسپتال جیل کے قیدیوں میں اچھی پناہ گاہ کے طور پر مشہور ہے، ماضی میں قیدیوں کی نجی اسپتال منتقلی کا نوٹس لینے پر محکمہ صحت کو شوکاز مل چکے ہیں،  قیدیوں کی منتقلی پر شوکاز نیب اور اینٹی کرپشن کی جانب سے بھیجے گئے تھے۔