کورونا کے باعث لاک ڈاؤن اقدام این سی او سی کی ہدایت سے مشروط ہے : وزیراعلیٰ سندھ

کراچی میں میڈیا سے گفتگو میں وزیراعلیٰ سندھ نے کہا کہ شہر میں کورونا کیسز میں تیزی سے اضافہ ہورہا ہے، کل کراچی کی تاریخ میں سب سے زیادہ کیسز رپورٹ ہوئے لیکن حالات اس وقت قابو میں ہیں، ہم صورتحال پرنظر رکھے ہوئے ہیں۔

انہوں نے کہا کہ کورونا سےاموات میں اضافہ نہیں ہو رہا، کیسز میں اضافے کے باوجود اسپتالوں میں دباؤ میں اضافہ نہیں ہوا  اور  وینٹی لیٹر پر مریضوں کی تعداد بھی کم ہے۔

مراد علی شاہ کا کہنا تھا کہ شہر میں لاک ڈاؤن سے متعلق فیصلہ این سی او سی کی ہدایات پرکیا جائے گا اور تعلیمی اداروں پر پابندیوں سےمتعلق ہماری نظریں این سی او سی پر ہیں، ملکی معیشت اس قابل نہیں ہے کہ پابندیاں لگائیں۔

انہوں نے مزید کہاکہ صرف سندھ نہیں پورے پاکستان میں کورونا کیسز بڑھ رہے ہیں، انتہائی تشویشناک یا وینٹی لیٹرز پر مریضوں کی تعداد زیادہ نہیں ہے، جو بھی حکمت عملی یا فیصلہ ہوگا وہ این سی او سی کے ساتھ مل کر کریں گے۔

واضح رہےکہ کراچی میں کورونا کیسز کی شرح میں تیزی سے اضافہ ہورہا ہے اور گزشتہ تین روز کے دوران شرح 15 فیصد سے تجاوز کرکے 29 فیصد کے قریب جا پہنچی ہے جب کہ شہر میں اومی کرون ویرینٹ کے 95 فیصد سے زائد کیسز ہیں۔