کیپٹن صفدر کیخلاف کیس میں مریم نواز کو شامل تفتیش کرنے کا فیصلہ

کیپٹن ریٹا ئرڈ صفدر کیخلاف آمدن سے زائد اثاثہ جات انکوائری میں اہم پیش رفت ہوئی ہے۔ نیب ذرائع کے مطابق مریم نواز کے کیپٹن (ر) صفدر کے بے نامی دار ہونے کے شواہد ملے ہیں۔ مریم نواز کے نام پر کیپٹن (ر) صفدر نے سندر میں 109 ایکٹر اراضی خرید رکھی ہے۔

دستاویزات کے مطابق موضع مال میں زمین مریم نواز کے نام سے خرید رکھی ہے۔ موضع بدوکی میں 62 کنال 2 مرلے کی زمین بھی مریم نواز کے نام پر خریدی گئی ہے۔نیب دستاویزات کے مطابق 14کنال ایک مرلے کی زمین رائیونڈ روڈ پر مریم نواز کے نام سے بنا رکھی ہے۔ مریم نواز تحصیل رائیونڈ میں 200 ایکٹر کی اراضی کی بے نامی دار ہیں۔

کیپٹن (ر) صفدر کیخلاف 2020 میں نیب خیبرپختونخوا کو شکایات موصول ہوئی تھیں۔ ذرائع کا کہنا ہے کہ لاہور میں زیادہ تر پراپرٹیز ہونے کے باعث انکوائری نیب لاہور کو منتقل کی گئی۔نیب کی جانب سے صدر مسلم لیگ ن مریم نواز کا موقف لینے کی کوشش کی جارہی ہے اور کیپٹن (ر) صفدرکے ذرائع آمدن سے متعلق تفصیلات طلب کی گئی ہیں۔

دوسری جانب لاہور ہائیکورٹ نے کیپٹن صفدر کی درخواست ضمانت منظور کرتے ہوئے نیب کو انہیں گرفتار کرنے سے روک دیا ہے۔ جی این این کے مطابق جسِٹس سرفراز ڈوگر کی سربراہی میں دورکنی بینچ نے کیس کی سماعت کی، کیپٹن ریٹائرڈ صفدر نے نیب لاہور کی جانب سے 10مارچ کو طلبی کے نوٹس ہائیکورٹ میں چیلنج کردیا، اور کہا کہ نیب لاہور نے آمدن سے زائد اثاثوں کے کیس میں دس مارچ کو طلب کررکھا ہے۔ آمدن سے زائد اثاثوں کی انکوائری نیب پشاور میں بھی زیر التوا ہے۔ پشاور ہائیکورٹ میں آمدن سے زائد اثاثوں کے کیس میں عبوری ضمانت دائر کررکھی ہے۔ ایک ہی معاملہ پر دو صوبوں میں انکوائری نہیں چل سکتی۔ 

ان کا کہنا تھا کہ سیاسی انتقامی کاروائی کا نشانہ بنایا جارہا ہے۔ پہلے پولیس کی جانب سے دائر کیے گئے مقدمات بھی بھگت رہا ہوں ، عدالت نیب لاہور کو گرفتار کرنے سے روکنے کا حکم دے۔ لاہور ہائیکورٹ نے کیپٹن صفدر کی عبوری ضمانت منظور کرتے ہوئے نیب کو گرفتاری سے روک دیا ۔