روس کو یوکرین پر ممکنہ حملے کی بھاری قیمت چکانا پڑے گی، امریکی صدر

غیرملکی خبر رساں ادارے کے مطابق امریکی صدرجوبائیڈن نے روس کی جانب سے یوکرین پرحملے کا خدشہ ظاہرکرتے ہوئے کہا کہ ایسا ہوا توروس کوبھاری قیمت چکانا پڑے گی۔

 امریکی صدرجوبائیڈن نے نیوز کانفرنس سے خطاب کرتے ہوئے کہ  روس یوکرین پرحملہ کرسکتا ہے۔ ایسا ہواتواس کی ذمہ داری مکمل طورپرروسی صدرولادی میرپیوٹن پرعائد ہوگی۔انہوں نے کہا کہ  روس نے یوکرین میں کارروائی کی تو میں وعدہ کرتا ہوں کہ روس پرایسی  پابندیاں عائد کریں گے جو اس سے  پہلے کبھی کسی نے نہیں دیکھی ہوں گی۔

جوبائیڈن نے مزید کہا کہ  روس کا یوکرین پرحملہ ایسا اقدام ہوگا جس کے دوررس نتائج نکلیں گے۔روس یوکرین میں کچھ کرنا چاہتا ہے اوروہ کرے گا۔ امریکا پولینڈ سمیت خطے میں نیٹو معاہدے کے تحت  اپنے فوجیوں کی تعداد بڑھا رہا ہے۔ 

خیال رہے کہ  روس نے 2014 میں کریمیا پرحملہ کرکے قبضہ کرلیا تھا۔