نیویارک میں  کل سے عوامی مقامات پر ماسک پہننے کی پابندی ختم

امریکا میں کورونا وبا میں کمی  کے بعد کئی ریاستوں میں فیس ماسک کے استعمال پر پابندی کے مرحلہ وار خاتمے کا اعلان کیا گیا ہے۔ نیویارک میں کل سے عوامی مقامات پر ماسک پہننے کی پابندی ختم کرنے کا اعلان کیا گیا ہے۔ اس کے ساتھ ساتھ امریکا کی کئی دیگر ریاستوں نے بھی اسی ماہ یا مارچ میں پابندیاں اٹھانے کا اعلان کردیا ہے۔ 

غیرملکی میڈیا کے مطابق نیویارک کے اسکول اور میڈیکل کئیر اداروں میں ماسک پہننا ہوگا۔ ریاست کیلی فورنیا کے گورنر گیون نیوزسم نے 15 فروری سے ویکسینٹیڈ افراد کے لئے بند مقامات پر فیس ماسک کی پابندی ختم کردی ہے۔

وائٹ ہاؤس کی ترجمان جین ساکی  کاکہنا ہے کہ تمام امریکیوں کو کووڈ کے پھیلاؤ کو روکنے کے لیے ان ڈور سیٹنگز، اور اسکولوں میں ماسک پہننا جاری رکھنا چاہیے۔

وائٹ ہاؤس اس بات کا تعین کرنے کے لیے اعداد و شمار کا جائزہ لے رہا ہے کہ آیا اس پالیسی کو تبدیل کرنے کی ضرورت ہے یا نہیں ، اور اس حوالے سے وہ سائنس اور ڈیٹا کی بنیاد پر فیصلے کرنے کے لیے  مشورہ دیتے رہیں گے۔ 

اس سے قبل  انگلینڈ نے بھی  دنیا میں سب سے پہلے کورونا پابندیاں مکمل ختم کرنے کا اعلان کیا تھا۔ برطانوی وزیراعظم بورس جانسن نے کہا ہے کہ چند ہفتوں میں ہی پابندیاں ختم کردی جائیں گی۔

واضح رہے کہ امریکا میں اس وقت ہر روز اوسطاً 73 ہزار افراد کورونا کا شکار ہورہے ہیں، اب تک ملک میں اس وبا سے 9 لاکھ سے زائد افراد ہلاک ہوچکے ہیں۔