مولانا فضل الرحمان نے چوہدری برادران سے تحریک عدم اعتماد کیلئے حمایت مانگ لی

تفصیلات کے مطابق آج لاہور میں مولانا فضل الرحمان اور چوہدری برادران کی ملاقات ہوئی ہے۔

ذرائع کا کہنا ہے کہ فضل الرحمان اور مسلم لیگ (ق) کی قیادت کے درمیان ملاقات دو سیشنزپر مشتمل تھی، دوسرے سیشن میں فضل الرحمان، چوہدری شجاعت، پرویز الٰہی اور اکرم درانی شامل تھے، مولانا فضل الرحمان نے تحریک عدم اعتماد پر ق لیگ کی قیادت سے حمایت مانگی۔

ذرائع کے مطابق چوہدری برادران نے پارٹی سے مشاورت کیلئے وقت مانگ لیا۔

اس موقع پر مولانا فضل الرحمان کا کہنا تھاکہ موجودہ حکومت نے مہنگائی سے عوام کی کمر توڑ دی ہے، یہ واحد حکومت ہے جس سے کوئی بھی خوش نہیں ہے، حکومت کے اتحادی بھی ان سے مطمئن نہیں ہیں۔

ملاقات میں چوہدری برادران کا کہنا تھاکہ پیپلزپارٹی اور جمعیت علمائے اسلام سے دیرینہ مراسم ہیں، ملک کیلئے جو بہترہوگا وہ کریں گے، اپوزیشن جماعتوں سے بعض تحفظات تھے اورہیں۔

یاد رہے کہ گزشتہ دنوں سابق صدر آصف علی زرداری نے بھی چوہدری برادران سے ملاقات کی تھی جس میں انہوں نے ق لیگ کی قیادت سے حکومت کے خلاف تحریک عدم اعتماد پر حمایت مانگی تھی۔