شمالی وزیرستان میں سیکیورٹی فورسز کی کارروائی، 6 دہشت گرد ہلاک

پاک فوج کے شعبہ تعلقات عامہ (آئی ایس پی آر) سے جاری بیان کے مطابق سیکیورٹی فورسز نے دہشت گردوں کی موجودگی کی اطلاع پر ضلع شمالی وزیرستان کے علاقے ہمزونی میں کارروائی کی۔

بیان میں کہا گیا کہ شدید فائرنگ کے تبادلے میں 6 دہشت گرد مارے گئے، جن کی شناخت محمد علی، مطیع اللہ، محمد عمر، اخترحسین، شیر اور وسیم کے نام سے ہوئی۔

کارروائی کے حوالے سے بتایا گیا کہ ہلاک دہشت گردوں کے زیر قبضہ اسلحہ، بارود اور دیگر آلات بھی برآمد کرلیے گئے، جس میں سب مشین گنز، دستی بم، مائنز اور گولیاں سمیت دیگر مواد شامل ہے۔

آئی ایس پی آر نے بتایا کہ ہلاک دہشت گرد سیکیورٹی فورسز کے خلاف سرگرمیوں، ٹارگٹ کلنگ اور اغوا برائے تاوان کی کارروائیوں میں ملوث تھے۔

بیان میں کہا گیا کہ مقامی افراد نے کارروائی کو سراہا اور علاقے سے انتہاپسندی کے ناسور کے خاتمے کے لیے اپنے مکمل تعاون کا یقین دلایا۔ واضح رہے کہ آئی ایس پی نے گزشتہ روز ایک بیان میں بتایا تھا کہ سیکیورٹی فورسز نے ڈیرہ اسمٰعیل خان کی تحصیل کولاچی میں کارروائی کے دوران 2 دہشت گرد مارے گئے۔

بیان میں بتایا تھا کہ ہلاک دہشت گردوں کا تعلق قریبی گاؤں سے تھا اور ان کے قبضے سے اسلحہ اور بارود بھی برآمد کرلیا گیا۔