یکم مارچ سے پٹرولیم مصنوعات کی قیمتوں میں اضافے کا امکان 

مہنگائی کے  ستائے عوام کیلئے ایک اور بری خبرآگئی ، آئل اینڈ گیس ریگولیٹری اتھارٹی (اوگرا) نے کرنسی کی قدر میں کمی اور تیل کی عالمی قیمتوں میں غیر معمولی اضافے کی وجہ سے یکم مارچ کو پیٹرولیم مصنوعات کی قیمتوں میں اضافے کا عندیہ دے دیا ۔  

ذرائع اوگرا کے مطابق اوگرا نے پٹرولیم مصنوعات کی قیمتوں سے متعلق ورکنگ کا آغاز کر دیا، گزشتہ 12 دنوں کے دوران عالمی مارکیٹ سے 96  ڈالر فی بیرل تیل خریدا گیا ، گزشتہ روز عالمی مارکیٹ میں خام تیل کی قیمتیں 100 ڈالر سے بڑھ گئی ہیں جس کے 28 فروری تک موجودہ قیمت پر خام تیل خریدنے کے اضافی اثرات مرتب ہوں گے۔ 

ذرائع اوگرا کے مطابق  اب تک کی ورکنگ کے مطابق یکم مارچ سے 8 روپے فی لیٹر  تک اضافے کا امکان ہے، عوام کو ریلیف دینے کیلئے واحد حل لیوی ٹیکس میں کمی ہے۔ 

 ذرائع  کاکہنا ہے کہ حکومت اس وقت پٹرول پر 17.62 روپے لیوی وصول کر رہی ہے، لیوی کی شرح 7 روپے تک کر کے قیمتیں برقرار رکھی جا سکتی ہیں، 27 فروری تک حتمی تجاویز تیار کر کے حکومت کو بجھوائی جائے گی۔ پٹرولیم مصنوعات کی قیمتوں سے متعلق حتمی فیصلہ وزیراعظم کریں گے۔

واضح رہے کہ ایک ہفتہ قبل ہی  ملک میں پٹرول کی قیمت میں 12 روپے  3 پیسے کا اضافہ کیا گیا ہے ۔ ہائی اسپیڈ ڈیزل کی فی لٹر قیمت میں 9 روپے 53 پیسے کا اضافہ کیا گیا۔ ، مٹی کے تیل کی فی لٹر قیمت میں 10.08 روپے  جبکہ  لائٹ ڈیزل آئل کی فی لٹر قیمت میں 9روپے 43 پیسے کا اضافہ  کیا گیا تھا ۔